SAAM LABU 99 - Ngawm Bible

Pathian Humtabel Kumpi

¹ Topa cu kumpi hi, leihum mihing ten lau in can tawtok haw hi. Topa cu Cherubim hum a, kumpi khunnakah khungin, Leipi cu hiing hi.

² Topa cu Zion ah Cungnungbelin um hi. Miphun hinnam hempoh uk khawng hi.

³ Mi hempoh ten a thawmngeng le a sunglawi mi a min cu pahcawi haw tuk hi. Amah cu thiangtho hi.

⁴ A Cungnungbel kumpi, nang cu thumanmi deih ci; Israel tei lakah dikcangnak hengtik ci; Nangmah in dikcangnak le thuman hengtik ci.

⁵ Topa a Pathian uh cu thangphat pahcawi un! A kumpi khunnak mai ah kuunin bia un! Amah cu thiangtho hi.

⁶ Moses le Aaron cu ama thiampite hi haw hi; Samuel vang amah biatu hi. Amuh ten Topa i lakah thu a nget haw ten Topa in ngai hi.

⁷ Amuh tei lakah Topa in meingo khalpi sung pen thuhilh hi. Amuh tei lakah daan le thukham a piak mite cu amuh ten zui in mang haw hi.

⁸ Maw Topa ka Pathian, na mihing tei sam ten don ci. A bawl sualnak haw hangin dantat navecin, Amuh tei sualnak ngaidamtu Pathian hi ci.

⁹ Topa a Pathian uh cu thangphat pahcawi un, A mual thiangtho ah amah bia un! Topa a Pathian uh cu thiangtho hi.