SAAM LABU 95 - Ngawm Bible

Thangphat Pahcoihnak La

¹ Hung un, Topa cu thangphat pahcawi nung hi! Eimuh huptu le pantu pa i nelah A lungdamnak uh la in sa tuk hung hi;

² Lungdamnak tuah a mai ah hawh nung; thangphat pahcoihnak la cu thatui zetin sa tuk hung hi.

³ Itahim titale Topa cu a Cungnungbel Pathian hi, pathianno hempoh tei humah Cungnungbel kumpi hi.

⁴ Lei buppi hi ama khut sungah um hi. A thukbel pen pan a sangbel muallek tianin aman uk khawng hi.

⁵ Ama bawlmi tuipi cu ukin, a semsuah mi leipi vang uk hi.

⁶ Hung un, a lu uh kunin amah cu bia nung; Topa, a bawltu i mai ah a khuk uh din nung;

⁷ Amah cu ohtei Pathian hi. Ohte cu a cingkhawi mi a mihingte hung hi; A cinmi tuuhonte hi hung hi. Tuni in, a thuhilhte ngai hem un.

⁸ “Meribah ah a hengmi na pu le pa uhte bangin! Lungmu ngeng pahsuh un. Massah phillawnah a hengmi na pu le pate bangin lungmu ngeng pahsuh un.

⁹ Amu ca in ka bawlmi hempoh mu leng haw naven khingkhai in langpang leng haw hi.

¹⁰ Kum sawm li sung pikpek hi mihing tei nundan ciat dimdem zo ing. I tizah muantak ngawl mihingte hi uh cim? Ka thukham pa khatno hei na zui uh ngawl hi! ti ing.

¹¹ Ka thinukzet hangin, colhdamnak nangmuh pia tung, tin ka tiamsa mi ngamah heng hihim tukma uh ci,” ti hi.