SAAM LABU 92 - Ngawm Bible

Thangphat Pahcoihnak La

¹ Topa i nelah lungdamnak thu son le, Cungnungbel Pathian, na minthannak lasak hi a nop dan!

² Zingsialin, a kho mi na itnak cu phuangin, khau tuah bawlmi tum nging awte le

³ phaidaak aw mawi tuah muantak na hihnak taksial phuan suah hi, a nop dan!

⁴ Topa aw, thasiahhuai na nadehmi in kei lungdamtik ci. Na thil bawl mite hangin lungdam lasa ing.

⁵ Topa aw, na thil bawl mite a thawmngeng daan! Na ngaihsutnakte thuk leita!

⁶ Misil tei theihtheih tukmi hi kha ma hi; Huakcum tei ngaihsut bat tuk hi kha ma hi.

⁷ Mipha ngawlte cu hampa bangin po haw tuk hi; Thil sual a bawltu cu khangtozet haw tuk hi. Mahnaven amuhte cu siatsuah co haw tuk hi.

⁸ Itahim titale Topa nang cu kumkhua in, Cungnungbel hi ci.

⁹ Na ngal thi tuk hi tih hei hihen; Mipha ngawlte cu sung haw tuk a, thehkeh khawng haw tuk hi, tih hei hihen thei ung hi.

¹⁰ Nangmah in khuicang bangin caktik ci; Nunnopnak thupha muicu pia zo ci.

¹¹ Ka ngal tei a sun haw mu ing a, mipha ngawl tei taunak za zo ing.

¹² Mifel cu tuumkung bangin khang hehu haw tuk hi. Lebanon a sidar kung bangin khang haw tuk hi.

¹³ Amuhte cu Topa i inn sung a, phutmi thingkung bang haw hi. A Pathian uh i Biakinn sung pen khang haw in,

¹⁴ a tek ceng sawng haw hei ten ngah haw hi; Kumkhua hing dimdemin khohzet haw hi.

¹⁵ Hi miten Topa cu midik hi, tih le mipha cangkim hi, tih langtik hi.