SAAM LABU 91 - Ngawm Bible

Eimuhte Huptu Pathian

¹ Cungnungbel Pathian nelah beltum tukin a zuantu hei in hihen, Cungnungbel i hupmi le cinkhawinak a cotu hei in hihen,

² Topa nelah, “Nang cu ka buknak le ka kulhtian hi ci. Ka Pathian hi ci, amah muangzet ing,” tin ti thei tuk hi.

³ Muh theih ngawlmi siatsuahnak pen hupin, a thitik thei mi nat siasuak a phunkim sung pen luattik tuk hi.

⁴ A ha tuah uapin, a cinkhawinak sungah him tuk ci. Muantak a hihnak cu na lumphol le na ngalnam hi tuk hi.

⁵ Zanlam a tawh theihmi thinsuk launakte hei lau tukma ci. Sunlam in, a heng thei mi haksatnakte hei lau tukma ci.

⁶ Khuathim lak a vak kawkawi thei mi pulhnat le sun ni cangcai a, mithat mang siatsuahtute hei hihen lau tukma ci.

⁷ Na elah mi thawng khat, na piam le pamah mi thawng sawm lum haw tuk hi. Mahnaven nang cu liamsuah kha haw tukma hi.

⁸ Mipha ngawl tei a thuak dan haw cu zo in mu tuk ci.

⁹ Topa cu panpihtu in, na bawl hangin le Cungnungbel cu humtu in, na man hangin hi.

¹⁰ Siatsuahnak imah tawk tukma ci. Na inn elah thisan luannak heng tukma hi.

¹¹ Na hawhnak hempoh ah nangmah humhimtu tukin le a cingtu tukin Pathian in, a vancungmite koih zo hi.

¹² A khutin cawi haw tuk a, na ke cu suang tuah kheng kha tukma hi.

¹³ Kiosa le ngulte tanpek tuk ci a, a lauhuaimi Kiosa le a ngu nei ngulte cu cilpek tuk ci.

¹⁴ Pathian, in, “Keimah a ittute cu pan tung a, ka min a theitute cu humhim tung hi.

¹⁵ A sam haw ten don tung, haksatnak a tawh haw ten amu lakah umpih tung; luattik tung a, minphatnak pia tung hi.

¹⁶ Nunkhua saunak laksawng pia tung a, nunpan hihim tung,” ti hi.