SAAM LABU 90 - Ngawm Bible

Bu Linak ( Saam 90-106 ) Pathian le Mihing

¹ Topa aw, nang cu kumkhua in ka inn hi ci.

² Mualte na bawl lai ngawlin le lei buppi na semsuah laih ngawlin nang cu patnak le tawpnak nei ngawl, a kumkhua in Pathian hi leleng ci.

³ Mihing cu lei ah kikleh tuk thupia in, lei ah cang lehtik ci.

⁴ Kum thawng khat cu nang lak pen ni khat bang hi. A bosa mi zansun bang hi in, zanlam hun comno sung bang na hi thong hi.

⁵ Tuilun bangin mihingte taivawktik ci. Zanmang sangin ngei phat saw cuang haw ma hi.

⁶ Zinglamin po a, khangto in taklam ten thimin, a ko mi hampa bangin thamthong haw hi.

⁷ Na thinuknakin siatsuah khawng ci. Na thinuk pulhangnak cu lau in can tawtok ung.

⁸ Ka sualnak uhte cu na mitmuhah koih ci; A kuhno in ka bawl sual uhmite hei, mu khawng ci.

⁹ Na thinuknak hangin ka khan uh comtik hi. Ka nunnak uh cu thusiam aw bangin tham hi.

¹⁰ A nuncak sung uh cu kum sawm salih hi in; A dam cak uh tale kum sawm liat vang hi thei hi. Mahnaven a nunsung uh kum i selhmi cu nuncimnak le thasiatnak ngeh hi. A nun uh cu a ngei ngawl bo in, paithongta hi.

¹¹ Na thinuknak a huham cu akua in thei zo tuk him? Na thin pulhangnak izahtak lauhuai him tihmi akua in thei zo tuk him?

¹² Cihnak ka ngah theihnak tukin, ka nun a com dan zilhin hi.

¹³ Topa aw, iti can thinukin um tuk cim? Kikleh inna, na silate hehpih zalin hi.

¹⁴ Zingsialin, na itnak tuah dimtikin; ka damsung uh nunnop le lasa in um tuk ung.

¹⁵ Haksat nuncimnak ka thuak sung uh hempoh, thasiatnak ka co uh zatin, lungdamnak co lehtik bokin hi.

¹⁶ Kohtei na sila hi na bawlmi nasezet mutikin hi. Thasiahhuai na bawl mite mutikin hi. Ka casuan uhte vang na sunloihnak cu mutik bokin hi.

¹⁷ Topa kohtei Pathian, na muicu thupha cu kohtei lakah um tahen! Ka bawl uhmi hempoh ah lawhtinnak pia in!