SAAM LABU 9 - Ngawm Bible

Pathian Dikcangnak Hangin Lungdamnak

¹ Topa aw, ka thin le lung venghawng tuah nangmah cu pahcawi tung, na lamdang thasiahhuai na bawlmi cu hilh tung.

² Nangma hangin lungdam zetin lasa tung. Maw Cungnungbel, na lakah thangphatnak lasa tung.

³ Nangmah amuh haw ten ka ngalte cu kik haw, lumin thi haw hi.

⁴ A dikmi thukhentu hi ci a, na khunnak humah khung ci; Keimah panin, thu khen ci.

⁵ Pathian thei ngawl minamte cu lawlin, mipha ngawlte cu siatsuah ci. Amuhte cu kumkhua in lalthong haw tuk hi.

⁶ Ka ngalte uh cu bolal khawng in, theih hi lehma toh hi, A khuapi haw cu sia laltik khawng ci. Theih batleh tuk hi haw ma toh hi.

⁷ Mahnaven Topa cu kumkhua in kumpi hi. Thukhen tukin a kumpi khunnak humah khung hi.

⁸ Lei buppi cu diknak tuah ukin, Pat peng mi nei ngawlin mi hempoh tei thu khen hi.

⁹ Bawlsiatnak a thuaktu tei ca in, Topa cu buknak kulhtian hi. Haksat hun ten himnak kulhtian hi.

¹⁰ Topa aw, nangmah a theitu ten nang cu muang haw tuk hi. Itahim titale na lak a hung mite cu, Nunghek awng ma ci,

¹¹ Zion pen mi a uktu Topa i lakah, thangphatnak lasa un. A thil bawl mite cu mi hempoh lakah hilh un.

¹² Mi haksa tei thuaknak cu Pathian in thei hi, A taunak haw phawkngil awng ma hi; Mah hangin a bawlsiatu tei humah phuba la hi.

¹³ Topa aw, kei hehpih zalin, Kei a huatu tei a bawlsiatnak haw hi mu zalin hi. Topa thihnak pen pansuak zalin hi.

¹⁴ Jerusalem khuasung tei mai ah dingin, Nang ka pahcoihnak thu le late hilh tung. Na patsuah hangin lungdam thu hilh tung.

¹⁵ Pathian thei ngawl minamte cu amu cawhmi khuk sungah caak haw; Thangsiahin, amuh le muh awkcop haw hi.

¹⁶ Topa cu a dikmi a thukhennakin amah langtik cop hi. Mahnaven mipha ngawlte cu amu bawlmi in awk cop haw hi.

¹⁷ Mipha ngawlte le Pathian a nunghektu hinnam tei lampi tawpnak cu thihnak hi.

¹⁸ Mahnaven mi ca-ngahte cu phawhngilh leleng haw tukma hi, Mi haksa tei muansan mi cu kumkhua in nepsuk hi tukma hi.

¹⁹ Topa aw, hungin hi; Mihingin nangmah do in ultung toh pahsuh hen. Pathian nei ngawlte cu na mai ah sam khawm inna, a thu haw khensakin hi.

²⁰ Topa aw, a thin haw sutikin; Mihing thawthong a hih haw lam theitik zalin hi.