SAAM LABU 89 - Ngawm Bible

Haksat Hun Sung Sakmi La

¹ Topa aw, na itnak cu la in sa leleng tung hi. Muantak na hihnak cu kumkhua in phuang tung hi.

² Na itnak cu kumkhua khimin muantak na hihnak cu van bangin kho tuk hi, tih thei ing.

³ Nangmah in, “Ka ten mi pa tuah thutepnak bawl zo ing; Ka sila David nelah thutiam zo ing.

⁴ ‘Na casuan ten catngawlin, kumpi dek leleng haw tuk hi; Na uknak cu kumkhua in khotik tung,’ ” tin ti ci.

⁵ Na lamdang na bawlmi vancung a, mi thiangtho ten la in sa haw tuk hi. Maw Topa muantak na hihnak cu mi thiangtho ten la in sa haw hi.

⁶ Topa aw, vancungah nangmah bang kuamah um haw ma hi. Ilai vancungmi in nangmah bang thei tuk him?

⁷ Mi thiangtho ten pumkhawmnak ah nangmah cu upat haw in, Na elkim a ummi ten nangmah kihca haw hi.

⁸ Maw Topa Pathian, Cungnungbel, Nangmah bang a ngilmi kuamah umma hi. Topa aw, ihempoh ah nang cu muantak hi ci.

⁹ Huham a nei zetmi tuipi cu ukin, tuihualpi cu daitik ci.

¹⁰ A lauhuai ngamsa Rahab cu that ci. Na ngal cu na ngilnak tuah neh khawng ci.

¹¹ Leipi hi nangmata hi; Van vang nangmata leleng hi. Lei buppi le a sung ummi hempoh vang semsuah ci.

¹² Hanglam le saklam vang nangma bawlmi hi. Tabor mual le Hermon mual ten lungdamin, na nelah lasa haw hi.

¹³ Huham na neihzia hi! Na zaangtha ngil daan hi!

¹⁴ Na ngam uknak cu diknak le thu mannak humah khung hi; Na bawlmi na hempoh ten na itnak le muantak na hihnak langtik haw hi.

¹⁵ Lasa in nangmah a biatu, na hehpih vaknak sung a a ngamta mi muicu hi uh ci. Lasa in nangmah a biatu le; na hehpih vaknak sung a ummi cu mi muicu hi haw hi.

¹⁶ Itahim titale nangmuhte hangin sun nilui a nunnop haw hi; Na phatnak hangin nangmah cu thangphat pahcawi haw hi.

¹⁷ Ngalnehnak nase zetin pia ci; Hehpihin nehtu hitik ci.

¹⁸ Itahim titale huptu tuk cu, Topa nangma ten mi hi. Israel tei a thiangtho Pathian nangmah in ka kumpi uh pia ci.

David Nelah Pathian Thutep

¹⁹ Nidang laih cawngin muhnak tuah na sila tei nelah thu phuangin, Ngalkap minthangzet tei humah, kumpi lukhu koih zo ing. A miphun sung pen tenmi pai lakah kumpi khunnak pia zo ing.

²⁰ Ka sila David cu tengin, nangmuh tei kumpi tukin sathau thih zo ing.

²¹ Ka ngilnak cu ama lakah um lelengin, ka huhamin mi ngilzetah cangtik tuk hi.

²² A ngal ten neh haw tukma hi. Mipha ngawlte vangin ti ngam haw tukma hi.

²³ A ngalte cu cilpek tung a, amah a huatute cu that tung hi.

²⁴ Amah cu it leleng tung a, ama ca in muantak hi leleng tung hi. Ngal neh lelengtu in bawl tung.

²⁵ A uknak ngam cu Mediterranean tuipi pepan Eufrates tuipi tian zaltik tung.

²⁶ Aman, ‘Nang cu ka pa le ka Pathian hi ci; Belhnak suangpi le pantu hi ci,’ tituk hi.

²⁷ Amah cu ka ca upabelin bawl tung a, kumpi lak pen kumpi ngengbelin bawl tung hi.

²⁸ Ama nel a ka thutepmi cu kimtik tung a, amah tuah thutep ka bawlmi cu kumkhua in kho tuk hi.

²⁹ A caleh ten kumpi in bawl leleng haw tuk a, a uknak cu van bangin kho tuk hi.

³⁰ Mahnaven a caleh ten ka daante zui haw ngawlin ka thukham bangin a ngamta haw ma tale,

³¹ ka thupiakmite imah sialkha ngawlin, ka thukhamte a zui haw ma tale,

³² amuh tei sualnak hangin dantat tung. Amuh tei khelhnak hangin vat tung.

³³ Mahnaven David cu it ngawlin um thei tuk mang hi. Ama lakah ka thutepmite vang kimtik ngawlin um tuk mang hi.

³⁴ Amah tuah ka thutepmi cu siatsuahleh tuk mang hi. Ama lak a, ka tepsami cu pa khatno hei la kikleh tuk mang hi.

³⁵ “Ama lakah ka min thiangtho in kumkhua phaat thutepnak bawl zo ing. David lakah zolthu son tuk mang.

³⁶ Catngawlin casuante nei tuk a, ni a umlaih sung zong a ngam uknak cu komno in zo tung.

³⁷ A ngam cu van a um thu theihpihtu hade bangin kumkhua in kho tuk,” ti hi.

Ngal Sun Hang Kahnak La

³⁸ Mahnaven na tenmi kumpi humah na thinuk ci; Amah cu taisan zo ci a lawl zo ci.

³⁹ Na sila amah tuah thutep na bawlmi cu phiat khawng zo ci, a kumpi lukhu cu lei ah vawksak ci.

⁴⁰ Khuapi upnak kulhtiante cu cimtik khawng ci. Ngalvilnak mun hempoh vang siatsuah khawng ci.

⁴¹ Vaksuk vakto ten a van haw nguksakin, a innnel ten cekpan bawlnakin mang haw hi.

⁴² Ngal nehtu a langpangtu tei nelah pia in, a lung haw damtik khawng ci.

⁴³ A naam haw mawltik khawngin, ngaldonakah sungtik ci.

⁴⁴ A kumpi khut cawi ceipi longleh ci, a kumpi khunnak cu lei ah nawmvawk ci.

⁴⁵ Amah cu tek hun laih ngawlin tektik ci, zahcak mualphonak tuah dimtik ci.

Luatnak Ca Thungetnak

⁴⁶ Topa aw, itik tian buleng tuk nge cim? Kumkhua tian maw? I can tian kaw na thinuknak mei bangin a alh tuk?

⁴⁷ Maw Topa mihing nunnak a comdan hi phawkngil pahsun. Mi hempoh thi tukin na bawl hi phawk ngil pahsun.

⁴⁸ Thi ngawlin a nung lelengtu akua um him? Khanmual heng ngawlin a luat thei tuk akua um him?

⁴⁹ Topa aw, ni dang laih a, na ihdan na langtik mite khi ilai ah him? David lak na tepsa mi na thutepnakte atu ilai ah um haw him?

⁵⁰ Kei na sila mi zotsak ka hihlam phawkngil pahsun. Lawki mitei nautat dan le a simsial ngawl haw dan hi!

⁵¹ Maw Topa na ngal ten na tensa mi kumpi cu zawnsak leita haw si! A hawhnak hempoh ah zawnsak haw hi.

⁵² Topa cu kumkhua in thangphat un! Amen! Amen!