SAAM LABU 84 - Ngawm Bible

Pathian Inn Ngai Haw

¹ Maw Cungnungbel Pathian, na Biakinn cu itih zahin him ka deih!

² Iti zahin him a sung heng tuk ka nuam! Topa i Biakinn sung hen tuk cu nuamzet ing. Ka thin le lung venghawngin, a nungmi Pathian nelah lungdamin lasa ing.

³ Maw Cungnungbel Topa, ka kumpi le ka Pathian, kawllit hei in bu nei haw a, piangpial ten inn nei haw hi. A canote haw cu na biaklandawh elah koih haw hi.

⁴ Na biakinn thiang sung a ummi le na nelah catngawlin thangphat la a satute cu izahin mi muicu hi haw him?

⁵ Na nel a thazaang a latu le Zion muallamah a lungmu a koihtute cu mi muicu hi haw hi.

⁶ A ko mi Baka luam sung a, hawh haw hei in, tui putnak munin cang hi. Khuapi nguahin lei kualnak hempoh tui dimtik khawng hi.

⁷ Amuh ten a hawhthahin cak dedeuh haw hi, pathian hempoh lak pen Pathian cu Zion ah mu tuk uh ci.

⁸ Maw Topa Pathian, Cungnungbel. Ka thungetnak ngai in! Maw Jakob Pathian, ka aunakte theihpih zalin hi.

⁹ Maw Pathian aw, humhimtu kumpi cu zo in, sathau na thih sa mi cu mitmai pha tuah zo in hi.

¹⁰ Na biakinn sung a ni khat um cu mundang a ni thawng khat um sangin pha saw hi. Mi ngilo tei inn sung a um sangin ka Pathian i inn kongka bul a din cu nuam saw ing.

¹¹ Topa cu humhimtu le a sunglawi kumpipa hi. Hehpihnak le sunloihnak tuah muicu pia hi. Thilpha a bawltu tei nelah thilpha piak tuk cu phalzet hi.

¹² Maw Cungnungbel Pathian, nangmah a muangtu cu mi muicu hi haw hi.