SAAM LABU 83 - Ngawm Bible

Ngal Nehnak Ca Thunget

¹ Maw Pathian aw, daidenin um pahsun; Mengdenin umthong pahsun!

² Zo hemin, na ngalte ngal tho li haw hi; A huatu ten ngal tho haw hi.

³ Na mihingte do tukin sawm kuh haw hi. Na humhim mi mihingte do tum haw hi.

⁴ “Hung un, a miphun haw in cimittik tung, Israel cu a kumkhua in, phawhngilh mi miphunin cang hen,” ti haw hi.

⁵ Amuhte cu lungkim zetin, a vaisiam khawm ceng haw ten Nangmah langpang tukin tangkhawm haw hi.

⁶ Edom mi, Ishmael mi, Moab mi le Hagar mite,

⁷ Gebal mi, Ammon mi, Amalek mi, Filistin mi le Taiya mite,

⁸ Assiria mi le a cak zetmi Lot i casuante, Ammon mi le Moab mi vang tel bok haw hi.

⁹ Midian mitei hum a na bawl bangin, Kishon ngunah Sisera le Jabin tei hum a na bawl bangin amuh tei humah bawl bokin hi.

¹⁰ Endor ah neh ci, a luang haw leihumah a muat a zan khawng bangin!

¹¹ Oreb le Zeeb tei hum a, na bawl bangin amuh uktu bawi tei humah bawl bokin hi. Zebah le Zalmunna na neh bangin, amuh puitute vang neh bokin hi.

¹² Amuhte in, “Pathian i ngam cu, keimu ngamah cangtik tuk ung,” tin ti haw hi.

¹³ Maw Topa cangvaite huih i muhvawk bangin le leivul bangin lengkektik khawng hi.

¹⁴ Tupite a kangtik thei mei bangin hihen, mualte a kangtik thei mei alh lek bangin hihen.

¹⁵ Amuhte cu na huihpi in hawlvawk inna, a lauhuaimi na huihpi in, a thin haw sutikin hi.

¹⁶ Maw Topa aw, amuh ten na huham a theihnak haw tukin, a mai haw cu zahcaknak tuah dimtikin hi.

¹⁷ Ngal sung lelengmi hi haw henna, kumkhua in, a thinsu haw tahen, Mualpho zetin thi haw hen,

¹⁸ Lei buppi uktu Topa cu nangmah bek hi ci, tih thei haw hen hi.