SAAM LABU 81 - Ngawm Bible

Puai Bawlnak La

¹ Eimu lam a tangtu Pathian nelah lungdamin um un, Jakob i Pathian nelah thangphatnak lasa un!

² Awnmawi tum pan unna, khuang neute tum un. Phaidaak a ngeng le neute tumin la mawi sa un.

³ Ha Thak ni le ha lik ni ten puai bawlnak tuuki mut un.

⁴ Himi cu Israel ngamsung daan hi. Jakob Pathian i thupiakmi hi.

⁵ Izipt ngam a do haw lai khin Israel tei nelah a piakmi thukham hi.

⁶ Ka theih awng ngawlmi aw za ing, Mah aw in, “Na ngum a puakmi vanngit uh cu dawn ing, na nadehnak uh bawm cu khuntik ing.

⁷ Haksatnak tawkin keimah na sam uhten pan ing. Ka ngelhnak huihpi sung pen don ing. Meribah tuiputnak el pen nangmuhte khingkhai ing.

⁸ Ka mihingte ngallinnak ka piakmi hi ngai un; Maw Israel, ka thu hi na ngaih tuk uhin deihzet ing!

⁹ Ngamdang pathian ituk mahten nei pahsuh un. Keimah sial ngawl pathiannote bia pahsuh un.

¹⁰ Keimah hi Topa na Pathian uh hi ing. Izipt ngam pen nangmuh suahtu ing. Na kamka unna, nangmuh an pia tung hi.

¹¹ Mahnaven ka mihing ten ka thu ngai haw ma hi. Israel miten ka thu zui haw ma hi.

¹² Mah hangin amu thinliannak bangin ngamtatik ing. Amu nuam bangin umtik ing.

¹³ Ka mihingte hi ka thu ngaitik nuamzet ing. Ka thu a zui haw ahin deihzet ing.

¹⁴ A ngalte manlang zetin neh tung a, Amuh a dotute cu bawlsia tuk naveng!

¹⁵ Keimah huatute cu launak tuah ka mai ah a lu haw kuntik tung. Amuh ka dantatnak cu kumkhua phat tuk hi.

¹⁶ Sangvut phabel tuah vak tung a, suang lak a, khuaitui cu khamzet tuk uh ci,” ti hi.