SAAM LABU 80 - Ngawm Bible

Israel Tei Kihlehnak Tuk Thunget

¹ Maw Israel tuucing, ngai hemin; Maw tuuhon hotu bangin Josef a puitu thei hemin! Cherubim hum kumpi khunnakah a khungtu aw,

² Na itnak cu Efraim, Benjamin le Manasseh phun tei nelah phuanglangdun zal inna, na ngilnak kohte lakin, pan zazalin hi.

³ Topa aw, kohte tungdingleh zalin hi. Na hehpihnak lak inna, himnak ngah tuk ung hi.

⁴ Topa aw, Cungnungbel Pathian, I can tian him na mihing tei thungetnak humah na thin na uk hih tuk?

⁵ Ka eih tukin thasiatnak pia ci. Ka in tukin hitui khuathai ngengpi a dimin pia ci.

⁶ Ka elkim uh a hinnam dangte cu ka ngam uh la nuamin, ka ngamsung uhah dodun haw hi. ka ngal uhten cekpan bawlnakin mang haw hi.

⁷ Maw Cungnungbel Pathian kohte tungdingleh zalin hi. Mitmaipha langtik inna, nunpatnak ngah tuk ung hi.

⁸ Izipt ngam pen sabit kung pa khat keng ci, Miphun dang hempoh na hawlvawk ceng ten, Amu ngam sungah mah sabit kung cu phut ci.

⁹ A khantoh theihnak tukin a lei bung ci; Lei thukpi ah a zungte mutsukin ngam hempoh khuh khawng hi.

¹⁰ Mualte cu a lim nuai ah um haw in; Sidar thing ngengpi vang kangkak ten khuh haw hi!

¹¹ Mah sabit kangkak cu zaamin, Mediterranean tuipi tian hengin Eufrates tuipi tian zaam hi.

¹² A kawnin upmi sente cu ita phialet haw him? A el a hawh hempoh ten a ngah ngu thei haw hi.

¹³ Ngaalcangin, siatsuah khawng a, hampa lak ngamsa ten ei haw hi.

¹⁴ Cungnungbel Pathian, keimu lamah hek kiklehin, vancung pen zo inna, mu zal inna, hung inna, nami tei nunpan zalin!

¹⁵ Hungin hi nangmah loli i phutmi sabit, phazet tukin na bawlmi sabit tawtsemnote panin hi.

¹⁶ Ka ngal uhten mah sabit cu sattanin mei ah haal haw hi. Na thinukin, a sat tantute zo inna, siatsuahin hi.

¹⁷ Na tensa mi na mihingte hupin, ngil zetin, na bawl zo mi na miphun cu!

¹⁸ Na nel pen pialleh hihim tukma toh ung hi. Nungtik inna, pahcawi tuk ung hi.

¹⁹ Topa aw, Cungnungbel Pathian, kiklehtik zalin hi. Na mitmai pha lak inna, nunpatnak ngah tuk ung hi.