SAAM LABU 79 - Ngawm Bible

Miphun Luatnak Ca Thungetnak

¹ Maw Pathian aw, nangmah a thei ngawltu ten na mihing tei ngam cu simin do haw hi. Na biakinn thiangtho cu nawngkaitikin, Jerusalem siatsuah khawng haw hi.

² Na mihing tei luangte cu vano tei eih tukin zam haw hi. Na sila tei luangte vang ngamsa tei eih tukin zam haw hi.

³ Na mihing tei thisan cu tui bangin luangtik haw hi. Jerusalem khua sung mun hempoh ah thisan cu tui bangin luang hi. Mithi luang phumtu tuk pa khatno hei tang ma hi.

⁴ Elkim a um miphun dang hempoh ten cekpan bawlnak mangin, nuihsanin nautat haw hi.

⁵ Topa aw, i can tian him kohtei humah na thin na uk tuk? Kumkhua in maw? Na thinuknak cu mei alh bangin alh leleng tuk maw?

⁶ Nangmah a bia ngawltu minamte le na min a sam ngawltu tei humah na thin vang uk pohin!

⁷ Itahim titale na mihingte that ceng zo in, a ngam haw vang siatsuah zo haw hi.

⁸ Mahnaven kohte hi ka pu le pa tei sualnak hangin dantat pahsun hi. Ka humah hehpihnak nei zalin hi. Itahim titale muansan tuk kuamah nei lehma toh ung hi.

⁹ Topa aw, bawm inna, panin hi. Na min sunloihnak tukin, Ka sualnak uh ngaidam inna, pan zalin hi.

¹⁰ Ita miphun dadang ten, “Na Pathian uh ilai ah um him?” tin dong leleng haw tuk him? Na sila tei thisan a luantik haw hangin hi miphun dangte na bawlsiat cu mutik zalin hi.

¹¹ Thawngta tei taunak aw cu ngai zalin hi. Thah tukin thu khensa mite cu na ngilnak huham tuah suakcatikin hi.

¹² Topa aw, na thangsiatnak na nelah a hentik mi haw hangin miphun dadang tei lakah zotsaknak let salihin heng lehtikin hi.

¹³ Na mihing na tuuhon kohten, kumkhua in, na nelah lungdamnak thu son tuk ung hi. Akhang akhangin thangphat pahcawi leleng tuk ung hi.