SAAM LABU 78 - Ngawm Bible

Pathian le A Mihingte

¹ Maw ka mihingte ka zilhmi thu hi ngai un, ka thuzilhmi hi na benghek hih un

² Nangmu nelah thu hilh tung: A bosa mi kum le hun a, thulamdangte hilh tung.

³ A beng uh i zaksa mi le a lungmu uh i theihsa mi, A pu le pa tei hilhsa mi thute hi.

⁴ Mah thu cu a cano tei lakah im ngawlin, Topa i huham le a thawmngeng i bawlmi nalamdangte cu khangleh tei lakah vang son tuk hung hi.

⁵ Israel tei nelah daan pia in, Jakob i casuan tei nelah daan pia hi. A ca tei nelah hilh tukin a pu le pa tei lakah thukham pia hi.

⁶ A ca haw ten amu ca tei nelah hilh haw in mah a ca haw ten amuh tei nelah hilh sawlawn pepel tukin piak hi.

⁷ Hitih bangin amuhte vangin Pathian muang haw tuk a, nalamdang a bawl mite phawkngil ngawlin a thukhamte zui leleng haw tuk hi.

⁸ Amuhte cu Pathian awnkam ngai ngawlin, mi langpang thei a pu le a pa bang hi haw ma hi, A pu le pate cu ituk mahten Pathian muangkho ngawltu le, Pathian i muantakin a um awng ngawl hi haw hi.

⁹ Thal le thalcang tuah ngal a dotu Efraim mite cu ngaldo hun a hen ngangai ten taikek khawng haw hi.

¹⁰ Pathian tuah thu a tep haw mi zui haw ma hi. A daan hei zui haw ma hi.

¹¹ A bawlsate le a mu hum a, nalamdang a bawl mite phawkngil zo haw hi.

¹² Izipt ngamsung Zoan munlawn a, Pathian nalamdang a bawlmi cu a pu le pa ten mu haw hi.

¹³ Pathian in tuipi cu khenin, tuite cu pang bangin dingtik hi. Mahlai pen lamhuai hi.

¹⁴ Sunah meingo pi tuah lamhuai in, zanah mei alh pi tuah lamhuai hi.

¹⁵ Phillawn ngamkhing a suangtum ngengpite cu kehtikin, a in haw tuk lei thukpi a, tui cu puttik hi.

¹⁶ Suangpi sung pen tui puttikin tui cu lui bangin luangtik hi.

¹⁷ Mahnaven Pathian humah sual leleng haw hi. Cungnungbel Topa dodalin, phillawn ngamkhingah ngal tho leng haw hi.

¹⁸ Pathian cu khingkhai him haw in, a deihmi an ngen him haw hi.

¹⁹ Pathian cu sonsia in, “Phillawn ngamkhingah Pathian in cabuai tuah an pia thei ngai ni maw?

²⁰ Suangpi cu vatin tui cu put hehu hi; Mahnaven cangho pia thei ngai ni maw? A mihing tei ca in, cik pia thei ngai ni maw?” tin dong haw laih hi.

²¹ Topa in, a ot haw a zak ten thinukin a miphunte cu mei tuah bawlsia in, a thinuknak cu a miphun tei humah nase dedeuh hi.

²² Topa cu a thinukin, a mihingte mei tuah bawlsia hi. Amuh cu Topa muang ngawlin le Topa in nunpan thei tuk hi tin, muang haw ngawlin a thinuk pulhang sesem hi.

²³ Mahnaven humlam van cu thu hilhin, a kongkate hong tukin thupia hi.

²⁴ Van pen an pia in, a eih haw tuk manna caksuktik hi.

²⁵ Hitih bangin vancungmi tei an ei haw in, Pathian in, a eih theih haw zahin pia hi.

²⁶ Mahceng ten nisuahnak lam huihtheutik hi; Hanglam huih cu a huham tuah thotikin,

²⁷ Amuh tei lakah vano cu leivul zahin hah hi. Tuipi el a philnel zah haw hi.

²⁸ A ngiahnak haw laizang, a puanbuk elah ahon ahonin caak menmun haw hi.

²⁹ Deih le val ei in, a lungkimzet haw hi, Pathian in, a kinmi haw hempoh pia hi.

³⁰ Mahnaven a eih laihtak haw in, a khenkhat cu tai zetin, a eih man lai haw ngawlin hi.

³¹ Pathian cu amuh tei humah a thinukin amu sung pen Mi ngilbel Israel mi lak pen khangno phabel that hi.

³² Mahtibang nalamdang tampi bawl naven a mihingte sual leng haw hi. A Pathian haw cu muang haw ma hi.

³³ Mah hangin a damsung haw ni khua cu haihawh bang comtikin, A nunnak haw upmawh khak ngawlin siatsuahnak tawk haw hi.

³⁴ Mi khenkhatte a thihtik ceng ten a dangte cu a nelah kikleh haw hi. A sualnak haw sik lehin lungmu tak tuah ama lakah thungen haw hi.

³⁵ Pathian cu amuh huptu hi tih theileh haw in, Cungnungbel cu amuh pantu hi tihmi phawkleh haw hi.

³⁶ Mahnaven a kam haw tuah pak hemin, a otmi haw hempoh cu zolthu ngeh hi. Thungai imah umma hi.

³⁷ A lakah muantakin um haw ma hi. Amah tuah a thutepmi kimtik haw ma hi.

³⁸ Mahnaven Pathian cu a mihingte hehpihzet hi. A sualnak haw ngaidamin, siatsuah ma hi. Vei tampi thinuknakte supin, pholhsuah zezen ma hi.

³⁹ A mihingte cu mi thawthong hi haw a, huih bang theu in, a thamleh thongmi bang haw hi, tih cu cing leleng hi.

⁴⁰ Vei izah him phillawn ngamah Pathian langpang tukin ngal a thawh uh! Vei izong thasiatik uh cim?

⁴¹ Atu le tu Pathian cu khingkhai haw in Israel tei a thiangtho Pathian cu a thinuktik haw hi.

⁴² A huham ngeng dan cu phawkngil haw hi! A ngal tei khut sung pen a humhimnak huhamte theileh haw ma toh hi.

⁴³ Izipt ngamsung Zoan lawnlai a, thasiahhuai nalamdang a bawl mite phawkleh haw ma toh hi.

⁴⁴ A lui haw hempoh thisanin cangtik khawng hi. Izipt mite cu a lui haw pen, tui ngah theileh haw ma toh hi.

⁴⁵ Amuh tei lakah tho hahin susia hi. Simphuk vang hahin, a lo haw siatsuah khawng hi.

⁴⁶ A lo ante ei khawng tukin le a lo haw siatsuah tukin khaau hah hi.

⁴⁷ A sabit kung haw cu nialin khiak khawngin, a theikung haw cu vukin thitik khawng hi.

⁴⁸ A khui haw cu ngialin thatin, a tuu haw cu kekin khiak khawng hi.

⁴⁹ A nase zetmi a thinuk pulhangnak le a thinuk so tawtok cu a hum hawah leihsuk hi. Mi thattu vancungmi lakah hah hi.

⁵⁰ A thinuknak hei supma; a nunnak haw hei khawih ngawlin pulhnatin thitik khawng hi.

⁵¹ Izipt mi innkua hempoh tei ca upabelte that khawng hi.

⁵² Tuucing bangin a mihingte cu phillawn ngamkhing tawnin lamhuai hi.

⁵³ Lungmuangzet lamhuai in, imah lau haw ma hi. A ngalte saw cu tuipi in khuhin thi khawng haw hi.

⁵⁴ A mihingte cu a ngam thiangtho ah hihen, A thiangthomi mualah hihen hawhpih hi.

⁵⁵ A mihingte mailamah a not pepel haw ten mah ngam a um mihingte cu hawlvawk haw hi. Ngam cu Israel hinnam tei lakah semin amu khua le amu inntekah umtik hi.

⁵⁶ Mahnaven amuh ten Cungnungbel Pathian cu khingkhai in do in ngal tho haw hi. A thukhamte zui haw ma hi.

⁵⁷ A pu le pate bangin ngal tho haw in, Thal pen kah tulmi a kawi kawkawi thalcang bang haw hi.

⁵⁸ Na pathiannote biaknak mun tulmia bawl haw hangin Pathian thinuktik haw hi. A milim haw hangin a thinuktik sesem haw hi.

⁵⁹ Mahti bangte amuh ten Pathian cu a thinuk so tawtokin, a mihingte lawl hi.

⁶⁰ Mihing tei lak a um meknak inn, Shiloh a puanbuk cu zamsan hi.

⁶¹ A huham le sunloih a langnak thukham kuang cu a ngal longtik hi.

⁶² A mihing tei humah a thinukin, a ngalte thattik khawng hi.

⁶³ Ngaldonakah tangval hempoh thi khawngin, khanglai tei ca pasal tuk hei umleh ma toh hi.

⁶⁴ Thiampite vang ngalnam hangin thi haw hi. A zite hei in kah thei haw ma hi.

⁶⁵ Dawltabel ten Topa cu a hihbuhnak pen a khangto bangin hihen, Sabittui tha tuah a thatho zetmi mi ngil pa bangin hihen thoto hi.

⁶⁶ A ngalte cu a nunglam hawah nawt pepel hi; A zahcak haw tuk tian nehin tho theileh haw ma toh hi.

⁶⁷ Mahnaven Josef i tu le cate cu lawlin, Efraim hinnamte tengleh ma zo hi.

⁶⁸ Amu ai-in Judah hinnam le a deihzet mi Zion mual teng hi.

⁶⁹ Mahlai ah vancung a umnak inn bangin a Biakinn cu sa hi. Leipi bangin khotikin, kumkhua in humhim hi.

⁷⁰ A sila David teng hi; Tuu a khalhnak pen le

⁷¹ Tuunote a cinkhawinak pen samin, Pathian in, a mite tuu bangin cingtu tukin Israel kumpi ah bawl hi.

⁷² A lungmu venghawng tuah pha zetin cingkhawi hi. Thiamting zetin lamhuai hi.