SAAM LABU 75 - Ngawm Bible

Thukhentu Pathian

¹ Maw Pathian aw, nang thangphat ung. Nangmah thangphat ung hi. Na thawmngeng dan cu tang aupih ung, Nalamdang na bawl mite hilh ung.

² Pathian in, “Thukhennak ni ciangtan zo ing. Mah ni ten thu a manin khen tung.

³ Leipi le a hum a ummi hempoh a pai khawng vangin, leipi dinnak bul cu khotik tung hi.

⁴ Mi ultungte tuangkhawng li tuk ngawltohin hilh ing; Mipha ngawlte pualthau tuk ngawlin hilhtik ing.

⁵ A tuangkhawnnak haw tawp tukin le a ultunnak haw cawl tukin hilh ing hi,” ti hi.

⁶ Thukhentu cu nisuah le nitumnak hei pen hihen, saklam le hanglam hei pen hihen hung ma hi.

⁷ Mi thukhentu cu Pathian hi, mi khenkhat cu nemsukin, mi khenkhat cu dangto hi.

⁸ Topa in, a khut sungah hai cawi hi, Mah hai cu a thinuknak sabittui tuah dim hi. Leih sukin, mipha ngawl hempoh ten in haw; Nungdawlbel a tangmi cak khat tian in haw hi.

⁹ Mahnaven Jakob i Pathian thu le la hilh le son cu cawl awng tuk mang. A nelah thangphatnak lasak vang cawl tuk mang.

¹⁰ Amah in mipha ngawl tei huham cu siatsuah tuk hi; Mahnaven mipha tei huham cu khangtotik tuk hi.