SAAM LABU 73 - Ngawm Bible

Bu Thumnak (Psalms 42-72 ) Pathian Diknak

¹ Pathian cu Israel tei lakah le lungthiang mitei lakah pha hi.

² Kei cu lum awndiak toh ing, ka kete tawlvawk li zo.

³ Itahim titale mi ultungte iksik ing, mipha ngawlte mihau a hih haw mu thei mang.

⁴ Amuhte cu natnak thuak haw ma; tidam zetin ngil vang ngil sih haw hi.

⁵ Midang tei thuak zahin thuak haw ma hi; Haksatnak vang midang zahin tawk haw ma hi.

⁶ Mah hangin a ultunnak cu khi-ngui bangin ok haw in; mi nehsiahnak cu puan bangin silh haw hi.

⁷ A lungmu haw in thilpha ngawl tultikin a ngaihsutnak haw cu a siasuak tuptahnak tuah dim hi.

⁸ Midang cu cekpan bawlnakin mang haw a thil mawi ngawl thu son haw hi. Ultungzet haw in midang zotsaknak thu vaisiam haw hi.

⁹ Vancung a Pathian sonsia in, leihum mihing tei lakah ultunnak tuah thupia haw hi.

¹⁰ Mah hangin Pathian mihingte cawmin, a lam hawah hekin a sonmi hempoh cu thatho zetin sang haw hi.

¹¹ Amuh ten, “Itin kaw Pathian in, a theihtheih tuk? Cungnungbel aman thei hihim tukma,” ti haw hi.

¹² Mipha ngawlte cu hiti bang hi thong haw hi. Thil tamzet nei haw naven tam dedeuh nei nuam haw hi.

¹³ Thiangtho zetin umin ka khutte vangin sualnak bawl ngawlin ka um hi thawnthongin maw a hih khawng tuk?

¹⁴ Maw Pathian aw, sun thaleng thuaktik zo ci; zingsialin dantat ci.

¹⁵ Mahti bangin kei in ka hilh a hin, na mihingte simsial ngawltu in suak tung hi.

¹⁶ Mah hangin hi thu cu thu haksazet ahi hei in, thei tum tukin nase zetin zuam ing.

¹⁷ Na biakinn thiang sungah hawh ing. Mahbek ten mipha ngawl tei humah, iti bang haw tuk him tih cu thei ing.

¹⁸ Lam nalnakah amuhte cu koih ci. Siatnak sungah caksuktik ci.

¹⁹ Thakhatin lalthong haw hi; A tawpnak haw cu mulling hah hi.

²⁰ Topa aw, amuh cu zinglamin, a pai thongmi zanmang bang hi. Na khatlawh ten iti bang him tih hei ciing lehma toh ci.

²¹ Ka thasia in ka thin a natzet ten,

²² Misil bang ing, imah ngaisung thei mang. Na lakah ngamsa bangin nung ing.

²³ Mahnaven catngawlin, na lakah um ing. Ka khut pen len ci.

²⁴ Na ngaihsut phatnak tuah kei pui ci. A tawpnakah upat minthannak tuah nangmah in kei pom ci.

²⁵ Vancungah nangmah sial ngawl nei ing kaw? Nangmah sial ngawl leihumah akua um tuk kaw?

²⁶ Ka lungmu le ka taksa hi a kiamsuk dedeuh vangin Pathian cu ka ngilnak hi. Amah bek kumkhua in ka kinmi hi.

²⁷ Nangmah nung a hektute cu thi tatak haw tuk hi. Na lak pen a taisantute cu nangmah in siatsuah khawng tuk ci.

²⁸ Mahnaven kei cu Pathian elah um ing, itih zahin nop him? A thil bawlmi hempoh hilh le son tukin, Topa Pathian cu ka himnak hi.