SAAM LABU 72 - Ngawm Bible

Kumpi Tatuk Thungetnak

¹ Maw Pathian aw, na diknak tuah thukhentu a hihnak tukin, Nangmah in kumpi cu hilhin hi. Na dikcangnak cotik bokin hi.

² Na mihingte komzetno in, thukhensak thei tuk a, diknak tuah mi ca-ngahte uk thei tuk hi.

³ Hi ngam hin khantoh nunnopnak co henna, diknak cu a lak hawah leng zal hen.

⁴ Kumpi in mi ca-ngah tei thu cu dik zetin son hen. Mi tingsamte bawm henna, Mi zawnsaktute cu sikpek hen.

⁵ Na mihing ten ni, a suah sung hempoh le, ha a vak sung hempoh, san a bo tianin, nangmah bia leleng haw tahen!

⁶ Kumpi cu hampa humah a cakmi nguah hi henna, leihumah a cakmi nguahtui bang hi zal hen.

⁷ A nun sung hempoh ah diknak pungzai henna, hade um sung hempoh khantoh nunnopnak um leleng zal hen.

⁸ A ukmi ngam cu tuipi pen tuipi tian; Eufrates Ngunpi pen leipi mawk tian zal tuk hi.

⁹ Ngamkhing mihingte a mai ah kun haw tuk a, a ngalte cu leivul lakah bok haw tuk hi.

¹⁰ Spain ngam kumpite le tuikulh kumpi ten laksawng pia haw tuk hi. Arabia le Ethiopia Sheba kumpite hei in siah pia haw tuk hi.

¹¹ Kumpi hempohin upatnak tuah a mai ah kuun haw tuk hi. Minam hempoh ten a na dek haw tuk hi.

¹² Amah samtu mi ca-ngahte cu pan hi. Mi tingsam belh tuk nei ngawlte vang hup hi.

¹³ Mi ca-ngah le cimnak a thuak tei humah, hehpihnak nei in, a nunnak haw hup hi.

¹⁴ Zotsaknak le thisan luannak sung pepanin; A nunnak haw cu ama ca in sunglawi hi.

¹⁵ Kumpi a nunkhua sau zal hen. Arabia ngam a suite a lakah piak hihen. Cawlngawlin, a lakah thungetnak um leleng hen; Pathian muicu a humah um leleng tahen.

¹⁶ Hi ngam sungah an tampi um hen; Mualte cu ankung tuah dim henna, lebanon ankung bangin a cang nei hen. Khuapi sung cu mihing dim henna, hampa lak a hampa zah haw hen.

¹⁷ A min cu kumkhua in kho tahen. Ni a um sung hempoh a minthang hen. Miphun hempoh ten amah thangphat haw hen; kumpi cu muicu pia in, Mahtibang muicu ngah bok tukin, miten Pathian nelah ngen bok haw hen.

¹⁸ Topa Thangphat un; Israel Pathian cu! Amah bekin hiti bang thasiahhuai nalamdangte bawl hi.

¹⁹ A min sunglawi cu kumkhua in thangphat un; A sunloihnak lei buppi ah dim hen. Amen! Amen!

²⁰ Jesse capa David i thunget tawpnak hi.