SAAM LABU 71 - Ngawm Bible

Putek Thungetnak

¹ Topa aw, nang cu ka himnak ci. Ituk mahten zakca in umtik pahsun.

² Na Dikcangnak tuah bawm inna, hupin hi. Ka kutnak ngai inna, pan zalin!

³ Ka buk mi suangpi hi zal inna, keimah huptu ngal kulhtian khohzet hi zalin hi. Nang cu ka himnak le ka ngal kulhtian hi ci.

⁴ Maw ka Pathian, mipha ngawl tei khut pen hupin; Hehpihnak a nei ngawlmi le mipha ngawl tei khut pen!

⁵ Topa aw, ka muansannak cu nangmah lakah um hi. Ka neu laih pen nangmah muang zo ing.

⁶ Ka nunsung hempoh nangmah muang ing. Ka hinsuk pepan nangmah in hup zo ci. Nangmah thangphat leleng tung.

⁷ Mi tampi tei ca in ka nunnak hi zohteh tak hi. Itahim titale nang cu a khozetmi ka ngal kulhtian hi ci.

⁸ Thalengin nangmah thangphat tung. Na sunloihnak thu than tung.

⁹ Miteek poh tin lawl pahsun, nemcuam ma poh tin nung hek zal pahsun.

¹⁰ Ka ngal ten that nuam haw; Siamkhawmin kei suam haw hi.

¹¹ A mun, “Pathian in nunghek zo, Hil nung inna, man nung; A huptu tuk kuamah um haw ma,” tin ti haw hi.

¹² Maw Pathian aw, lam khawlapi ah umsan zal pahsun; Maw ka Pathian, manlangin bawmin hi.

¹³ Keimah a dotute cu zakca in um haw henna, siatsuah khawng hi haw tahen. Liamsuah a tumtute cu zakca le mualpho in um haw tahen.

¹⁴ Ka muansannak cu na lakah koih leleng tung. Nangmah cu thangphat dedeuh tung.

¹⁵ Na diknak hilh tung. Na patnak cu ka theih celh ngawlmi hi haw naven sun nilui in son tung.

¹⁶ Maw Cungnungbel Topa, na huham pahcawi tung. Na diknak, nangma diknak bek aupih tung.

¹⁷ Maw Pathian aw, ka naupang laih pepan nangmah in zilh zo ci; Tutianin, na thil bawlmi thasiahhuai cu son ing.

¹⁸ Maw Pathian aw, tekin, a puakpak zo poh tin, nunghek zal pahsun. A heng tukmi san thak lakah na huham le na ngilnak ka aupih ten ka lakah um zalin hi.

¹⁹ Maw Pathian aw, na diknak cu van khong hi. Thasiahhuai nate bawl zo ci; Nangmah a bangtu kuamah um haw ma hi.

²⁰ Haksatnak le cimnak ka humah hengtik ci. Mahnaven ka tha dimtikleh tuk ci. Khaan sung pen pantul tuk ci.

²¹ Masa laih sangin khaisang tuk ci. Nangmah in hehnemleh tuk ci.

²² Phaidaak tuah nangmah thangphat hihim tung. Maw ka Pathian, muantak na hihnak cu thangphat tung. Ka phaidaak tumthahin, na lakah lasa tung; Maw nang, Israel tei mi thiangtho.

²³ Nangma ca in phaidaak a tum haw ten lungdamin lasa tung; Na pat zo hangin, ka nunnak venghawngin lasa tung.

²⁴ Keimah siatsuah a tumtute cu zakca le mualpho in, a um zo haw toh hangin, sun nilui in, na diknak thu hilh tung.