SAAM LABU 68 - Ngawm Bible

Ngampi La

¹ Pathian cu tho henna, a ngalte khenkhek khawng hen. Amah a huatute cu taivawk khawng haw tahen.

² Meikhu cu huihin, a muhvawk bangin, a man hawlvawk khawng tuk hi. Khuainun cu mei ah a zung khawng bangin, Mipha ngawlte cu Pathian mai ah paithong khawng haw tuk hi.

³ Mahnaven midikte cu a mitmuhah, lungdam zetin li au haw tuk hi.

⁴ Pathian nelah lasa un; ama min cu Topa hi; Meikhu hum a khungtu pa ca in lamsial un. A mai ah na lung uh dam un.

⁵ Pathian i Biakinn thiangtho sungah a umtu in, Nu le pa nei ngawl ca-ngahte ngaihsakin, meivongte hup hi.

⁶ Lungleng khawngai in, a ummite umnak tuk pia hi. Thawngtate suahcaknakah lungdamin huai hi. Mahnaven ngalthotute cu ngamko lakah tang haw tuk hi.

⁷ Maw Pathian aw, na mihingte pui tulin, phillawn tawnvawkin, na hawhpih ten,

⁸ Sinai Pathian, Israel Pathian a hen ten leipi hing dudumin van pen nguah leihsuk hi.

⁹ Pathian in nguah tampi a zuktik hangin, leicul ngamkote hing lehtik ci.

¹⁰ Na mihing ten mahlai munah panmun khual haw hi. Na phat hangin mi ca-ngah cawm ci.

¹¹ Topa in thukham pia in, numei tampi ten thuthang cu hawhpih haw;

¹² “Kumpite le a ngalkapte cu taivawk haw hi,” ti haw hi. Inn a um numei ten na lon uhmi cu sem haw hi.

¹³ Na lon uhte cu sui hade bang mul neimi ngun tuah tuammi khulo zukte hi. (Itakaw mi khenkhat ngaldo ni-in tuu inn sungah tuute tuah na umthong uh?)

¹⁴ Cungnungbel Pathian in Zalmon Mual humah Kumpite a khenkhek khawng ten mahlaiah vuktatik hi.

¹⁵ Maw Bashan mual, mualbawk tampi neitu mualpi,

¹⁶ Itakaw Pathian in ama umnak tukin a tenmi mual cu na mualbawk hum pen nautatnak tuah na zoh? Topa cu a tenmi mualah kumkhua in um tuk hi.

¹⁷ A cak zetmi cipuh leeng thawng tampi tuah Topa cu Sinai Mual pen mun thiangtho ah hung hi.

¹⁸ Topa cu muallekah kai hi. A ngalmatmi tampi hawhpih hi. Ngalthotu tei lak pen laksawng tampi ngah hi. Topa Pathian cu mahlai ah um tuk hi.

¹⁹ Topa cu thangphat hi tahen. A vanngit uh nisialin dawn hi; Amah cu ohte pantu Pathian hi.

²⁰ A Pathian uh cu mi pantu Pathian hi. Thihnak pen a pansuaktu Topa hi.

²¹ Pathian in amah a dodaltute le a sualnak haw lampi a zui lelengtu tei lu cu sukeh khawng tuk hi.

²² Topa in, “Na ngalte uh cu Bashan pen pui tung a, tuipi thuanthum a thukbelnak hei pen tulpih tung hi.

²³ Na ngal tei thi luang menmunte hei pen ke tuah hawh thei tuk uh ci. Na uico uh hei in amuh tei thi cu a duhzah haw in liak haw tuk,” ti hi.

²⁴ Maw ka Pathian le ka kumpipa, munthiangah na hawh laih cu mi hempohin mu haw hi.

²⁵ Masabelin lasatu hawhin, nunglamah la tumtute hawh haw hi. A laklawh hawah khuang tumtu khanglaite hawh haw hi.

²⁶ “Pathian cu a mihing tei tawhdun khawmnakah thangphat un! Israel casuan hempohin, Topa thangphat un,” ti haw hi.

²⁷ Masabelin, a nam sung haw pen ca nautabel Benjamin hinnamte hung haw in; Mah sangtu ah Judah puitute, amu puimite tuah hung haw hi. Zebulun le Naftali puitu ten zui haw hi.

²⁸ Maw Pathian aw, na huham langtikin; keimu lakah na man mi huham cu!

²⁹ Kumpi ten laksawng a piaknak haw Jerusalem khua na Biakinn pen.

³⁰ Phaikung lak a ummi ngamsa bang, Izipt cu liat inna, khuinote tuah a tami khuicang honpi bang miphunte cu hupin; Na mai ah kunin, a ngun haw a piak laklawh haw, nun hilhin hi. Ngaldo bebek a nuamtute cu khenkhek khawngin hi.

³¹ Izipt ngam pen hahmi kamtaite hung haw tuk; Ethiopia miten Pathian nelah thungenin, a baanzak haw tuk hi.

³² Maw leihum ngamte, Pathian nelah lasa un. Topa i lakah thangphatnak lasa un;

³³ Kumkhua in, a kho mi van, mah vante a khungtu lakah! Nase zetin, a au mi aw cu ngai un.

³⁴ Pathian i huham thangtik un. A sunloihnak cu Israel humah um hi. A ngilnak cu Vanhaang nuai ah khin um hi.

³⁵ A mun thiangtho sungah Pathian cu Itihzah tian lauhuai him? Israel i Pathian cu! Ama mihing tei lakah ngilnak le huham pia hi. Pathian cu thangphatin um tahen!