SAAM LABU 66 - Ngawm Bible

Thangphatnak le Lungdamnak La

¹ Leihum mite, Pathian thangphatin lungdam zetin au un.

² Ama min sunloihnak lasa un, sunglawi zetin a lakah pahcoihnak pia un!

³ Pathian nelah, “Na thil bawl mite thasiahhuai daan hi! Na huham a nasezet tak, na ngalte cawmin lau in, na mai ah bok haw hi.

⁴ Leihum mi hempohin, na mai ah kuunin bia haw hi. Thangphatnak lasa haw hi. Na min pahcoihnak lasa ung,” tin Pathian nelah ti un!

⁵ Pathian i bawlmi hi zo hem un! Mihing tei lak a bawlmi thasiahhuai hi!

⁶ Tuipi leiko in, a suahtik bangin, a pu le pa uhten tuipi sung pen leiko tawnin tan haw hi. Mahti bangin a bawl hangin a humah a lung uh dam hi.

⁷ A ngilnak tuah kumkhua uk lelengin, a mit tuah miphunte cu zo leleng hi. Iti bang ngal hei in amah dodalin, tho haw pahsuh hen.

⁸ Miphun hempoh, a Pathian uh thangphat un! Na thangphatnak uh cu thang khawng hen!

⁹ Aman nungcatik zo a, bah tuk phal ma hi.

¹⁰ Pathian aw, kohte cu khingkhai zo ci. Ngun cu somei tuah a khingkhai haw bangin, kohte vang khingkhai zo hi.

¹¹ Thang a siah haw mi sungah caaktikin ka ngum uhah thil ngitzet koih ci.

¹² Ka ngal tei sihpekmi in bawl ci. Meipi le tuilun lakah hawh ung. Mahnaven atu-in himnak munah henpih zo ci.

¹³ Na innah meihal biaknakte cawi tung. Ka tepsa mi cu pia tung hi.

¹⁴ Haksatnak ka tawh laihin, ka thutepmi cu kimtik tung hi.

¹⁵ Biaklandawh humah halkang biaknak tuk tuu pia tung hi. Khuicang le keelcangte biakpiaknakah pia tung hi.

¹⁶ Pathian a upattute, hung unna, ngai un; A ca in, a na bawl mite hilh tung hi.

¹⁷ A lakah bopnak ngenin au ing. La in thangphat ing.

¹⁸ Ka sualnak hi imah kinmawh ngawlin ka um ahin, Topa in ka thungetnak ngai tukma hi.

¹⁹ Mahnaven Pathian in thei zo hi. Ka thungetnak ngai zo hi.

²⁰ Ka thungetnak lawlthong ngawlin a ihnak vang ka lak pen a lak kikleh ngawl hangin Pathian cu thangphat ing.