SAAM LABU 64 - Ngawm Bible

Himnak Tuk Thungetnak

¹ Maw Pathian aw, haksatnak tawk ing, ka thungetnak ngai zalin, ka thinsu hi, ka ngal tei khut sung pen luan zalin hi.

² Mipha ngawl tei suamnak pen hup zal inna, misual honpi tei lak pen humhimin hi.

³ A lei haw cu ngalnaam hiam bangin tat haw a, a ot pha ngawl haw thal bangin el haw hi.

⁴ Zahcaknak um ngawlmi zolthu zaitik tuk cu manlangzet haw in; mi phate cu ngalnawm thah zetin siatsuah haw hi.

⁵ Thupha ngawl vaikupnakah pa khat le pa khat sodun haw hi. A thangsiahnak tuk munte vaihawmin hi thang hi “Kuamah in mu haw tukma,” tin ti haw hi.

⁶ Thilpha ngawl ngaisungin, “Mi siatsuah tukin cangcian zetin ngalling leng zo ung,” tin ti haw hi. Mihing tei lungmu sung thu le a ngaihsutnak haw cu thukzet hi.

⁷ Mahnaven Pathian in, a thalcangin kap tuk a, maliam paih haw tuk hi.

⁸ A awnkam haw hangin Pathian in siatsuah tuk hi. Amuh mutu hempoh ten a lu haw thing haw tuk hi.

⁹ A venghawng haw in lau in can haw tuk hi. A nadeh mite ngaisungin thil bawl mite cu hilh haw tuk hi.

¹⁰ Topa thil bawlmi hangin, midikte a lung haw dam tuk hi. A lakah himnak mu haw tuk hi; Lungmu a thiangmi ten amah thangphat haw tuk hi.