SAAM LABU 58 - Ngawm Bible

Mipha Ngawlte Thuk Tuk Thunget

¹ Maw uktute, dik le camin thukhen ngangai uh cim? Mi hempoh manno in, a thu haw khensak ngangai uh cim?

² Hi ma hi! Thilpha ngawl bawl na tum uhmi bek ngaisungin, Hi ngam sungah thisan a luangtiktu cu nangmuh uh ci.

³ Mipha ngawlte cu a nunsung haw hempoh pha ngawl lelengin um haw in hi. A hintul haw pepan zolthu son haw hi.

⁴ Ngul bangin ngu nei haw in, a ngu haw cu thihsi hi. Thu thei nuam ngawlin benghup haw hi.

⁵ Ngul i nei aw hihen, mitzial thiam i aw hihen, A theithei ngawl toh ngulngan bengbul bangin hi.

⁶ Maw Pathian aw, a ha haw su-ek khawngin, Topa aw, hi a, lauhuai kiosa tei, ho cu hong khawngin hi.

⁷ A kangmi tui bangin pai khawng hawta henna, lampi a sihpekmi hampa bangin thim khawng tahen.

⁸ Dalkawng a vah lih laih takin taklei a suah bangin hi tahen A thisa in hinmi nauno, khuavak amu awng ngawl bangin hi tahen.

⁹ Mah thu a theih haw laih ngawlin hampa bangin tan khawng hi haw hi. Pathian thinuknakin, a nunlaih loli hawah Huihsia bangin mutvawk tuk hi.

¹⁰ Midik ten misualte bawlsiatnak a thuak haw khi, Amuh haw ten a lungdam haw tuk hi. Mipha ngawl tei thisan lakah a ke haw som haw tuk hi.

¹¹ Miten, “Midik ten laksawng ngah tatak haw. Leihum buppi thukhentu Pathian um ngangai na hi,” tin ti haw tuk hi.