SAAM LABU 57 - Ngawm Bible

Bopnak Tuk Thungetnak

¹ Kei hu hehpih zalin, Pathian aw, hehpih zalin, na lakah himnak deihin hung ing A lauhuai huihsiapi a bo khawng laklawh, na ha nuai ah himnak ngah ing.

² Pathian cu sam ing, Cungnungbel cu! Ka kulmi hempoh a piatu Pathian cu sam ing.

³ Van pen don tuk a, kei pan tuk hi. Kei a dotute cu neh tuk hi. Pathian in, a ihnak le muantak a hihnak cu ka nelah langtik tuk hi.

⁴ Ngal ten keimah kil haw amuhte cu mi eitu kiosa bang haw hi. A ha haw cu ceipi le thalcang bangin hiamin, a lei haw cu ngalnam bangin hiam hi.

⁵ Pathian aw, na thawm ngengnak cu vanah khin langtik inna, na thawm ngengnak vang leihum buppi ah langtikin hi.

⁶ Keimah man nuamin, ka ngal ten suukthang siah haw. Thinkham zetin um ing. Ka hawhnak lampi ah khuk co haw, mahnaven amuhleh lam caak haw hi.

⁷ Pathian aw, ka lungmu cu khozet hi. Lasa tung a, nangmah thangphat tung.

⁸ Maw ka hawvang, khanglo in, ka phaidaak le ka pheveu tho toh un. Ni vang phong tung.

⁹ Topa aw, miphun tampi lak pen nang pahcawi tung! Mihing tampi lak pen vang pahcawi tung.

¹⁰ A kho mi na ihnak cu vancungah heng hi; Muantak na hihnakin van khong hi.

¹¹ Maw Pathian aw, na thawm ngengnak cu vanah langtik inna, na sunloihnak cu leihum buppi ah langtikin hi.