SAAM LABU 56 - Ngawm Bible

Pathian Muannak Tuah Thunget

¹ Maw Pathian aw, ka humah hehpihnak nei zalin, ka ngal ten do in catngawlin kei bawlsia haw hi.

² Sun nilui in ka ngal ten do haw, keimah dotu tam ngangai haw hi.

³ Lauthawngnak ka neih ten, maw Cungnungbel Topa, nangmah muang ing.

⁴ Pathian muangin, a thutepnak thangphat ing. Amah ka muan hangin imah lau tuk mang. Mihingin ka humah ikaw a bawl theih tuk?

⁵ Ka ngal ten thalengin haksatnak pia haw in, Keimah liamsuah tuk bek a phunkimin ngaisung haw hi.

⁶ Keimah that nuamin, a ngelhnak mun hawah tawkdun khawm haw in, ka bawlmi hempoh zo kuh leleng haw hi.

⁷ Maw Pathian aw, a phat ngawlnak hangin bawlsia in, na thinukin vawk khawngin hi.

⁸ Izah takin ka lungkham him tih cu nangmah in thei ci. Ka hitui tulnak cu cazin sungah ngan zo hi ma cim maw? Na laibu sungah ngan toh cim?

⁹ Nangmah ka sam ni pen, ka ngalte cu nungkik haw tuk hi. Hi thil pa khat thei ing; Pathian cu keima lamah ding hi tih thei ing.

¹⁰ Pathian muangin, a thutepnak thangphat ing, Topa i thutepnak cu thangphat ing.

¹¹ Amah ka muan hangin imah lau tuk mang. Mihingin ka humah ikaw a bawl thei tuk?

¹² Maw Pathian aw, ka tepsa mi cu pia tung. Nangmah pahcoihnak cu ka biakpiaknak ai-in pia tung hi.

¹³ Itahim titale thihnak pen kei luattikin, lupbahnak pen kei hup zo ci. Mah hangin Pathian na mitmuhin, a vakmi nunnak lampi ah hawh ing.