SAAM LABU 55 - Ngawm Bible

Bopnak Tuk Thunget

¹ Maw Pathian aw, ka thungetnak hi ngai zalin; ka ngetnak hi nunghek zal pahsun.

² Ngai inna, don zalin hi. Ka lauthawngnak hangin cawl zo ing.

³ Ka ngal ten a thup haw hangin le mipha ngawl ten a zotsak haw hangin amthong ing. Haksatnak ka humah hengtik haw. Ka humah a thin haw ukin hua sih haw hi.

⁴ Launak tuah ka lungmu cu dimin, thih tuk lauthawngnakin ka hum pen delh hi.

⁵ Lauthawngnakin keimah delhcih a, mulcangsuakin can tawtok ing.

⁶ Aw, khulo bangin ha ka nei ahin nuam sing! Leeng tung a, colhnak mu tung hi.

⁷ Khawlapi ah leng tung a, ngamkhing munah umnak inn sa tung.

⁸ Huihsia le nguah thuak tuk ngawlin manlang zetin buknak zei tung.

⁹ Topa aw, ka ngalte a lung haw siltik inna, a awn haw pahpaltik khawngin hi. Itahim titale khuapi sungah sualdunnak le, hauhdunnak bek mu ing.

¹⁰ A sun a zanin khuapi kulhtian hum pen khuapi cu kil haw in, khuapi cu hauhdunnak le liamsuah dunnak tuah dim hi.

¹¹ Mun hempoh siatsuahnak bek um a, Khuasung lampite cu siatsuahnak le zoldunnak tuah bekin dim hi.

¹² Kei zawnsaktu cu ka ngal ahi ahin, thuak thei leng tung. Ka humah a tuangkhawngtu cu ka ngal ahi ahin, a lak pen ngelhsan tung.

¹³ Mahnaven tu a ka ngal cu ka theih mi nangmah, ka nadehpih le ka ngualcam hi ci.

¹⁴ Nop zetin thu hilhdun hung a, biakinn ah mipite tuah hawh langkhat mek hung hi.

¹⁵ A hun haw a heng laih ngawlin ngalte cu thi haw hen, thihnak ngamah a nungcungin heng haw hen, A innkua sung hawah le a lungmu sung hawah, phat ngawlnak nguakcangin dim hen.

¹⁶ Bopnak ngenin Topa Pathian sam ing. Aman pan tuk hi.

¹⁷ Na phuk lihnak le ka taunak cu a lakah, Zing, sun le zanin hengin, ka aw cu za tuk hi.

¹⁸ Ngal tampi ka donak mun pen himdamno in kihpih tuk hi.

¹⁹ Kumkhua in uktu bawi ahi lelengmi Pathian in ka aunak za tuk a, ka ngalte cu neh tuk hi. Amuh ten imah bawl thei haw tukma itahim titale amah kihcaknak nei haw ma hi.

²⁰ Masa laih a, ka ngualcam awng ten a ngualcamte do hi. A thutepsate siatsuah khawng hi;

²¹ A kam cu sathau sangin naal saw hi; Mahnaven a lungmu sungah huatnak dim hi, A awnkam cu sathau sangin naal saw hi; Mahnaven ngalnam bangin mi at thei hi.

²² Na van ngit uh cu Topa i lakah ap unna, na tha uh damtik tuk hi. Midik cu ituk mahten sungtik tukma hi.

²³ Mahnaven maw Pathian aw, nangin mithat tute le zolthu sontute cu a khan haw thanthep laih ngawlin khuk thukzet sungah khiasuk tuk ci. Kei cu nangmah bek muang ing.