SAAM LABU 51 - Ngawm Bible

Sualzahnak Tuk Thunget

¹ Maw Pathian aw, a khomi na ihnak hangin, Kei hu hehpih zalin, Na hehpihnak a ngeng hangin Ka sualnakte thiangtik zalin hi.

² Ka phat ngawlnak cu som ciang inna, Ka sualnak pen thiangtik zalin hi.

³ Ka mawhnak thei ing a, ka sualnak cing leleng ing.

⁴ Na humah sual ing, na hum bebekah sual ing. Thil pha ngawl na tihmi cu bawl zo ing. Mah hangin thukhennak na piakmi cu a manmi hi. Mikhial a na koihmi vang cu a manmi hi.

⁵ Ka hintul pepanin sual zo toh ing. Ka nui pum sung pen misual hi zo toh ing.

⁶ Thutak le lungmu tak cu na deihmi hi, Ka lungmu cu na cihnak tuah dimtikin hi.

⁷ Ka sualnak cu vawksak inna, mithiang hi tung hi. Som inna, vuk sangin ngo saw tung hi.

⁸ Thin nopnak le lungdamnak awnkam theitik zalin; na siatsuah sa mi ka taksa cu thin nop le lungmuangno in umleh tuk hi.

⁹ Ka sualnak cu zo nuam pahsun, ka phat ngawlnak vang nawtciang sak khawngin hi.

¹⁰ Maw Pathian aw, lungmu thiang ka sungah piangtikin; ka sungah a thak le a dikmi hawvang cu koihin hi.

¹¹ Na umnak na mai pen hawlvawk zal pahsun. Na hawvang thiangtho cu ka lak pen la zal pahsun.

¹² Na patnak pen a hungmi thinnopnak cu pialeh inna, ka hawvang cu na thu ngaitu hitik zalin hi.

¹³ Misual lakah na thupiakmi cu hilh tung a, na lakah kikleh haw tuk hi.

¹⁴ Maw Pathian aw, kei pantu, ka nunnak cu khawih zalin, Na diknak cu lungdam zetin au tung.

¹⁵ Topa aw, ka muk hong inna, nangmah thangphat tung.

¹⁶ Biakpiaknak cu na deihmi hi ma hi. Na deih tale pia zo tuk toh ing. Meihal biakpiaknak vang na lungdammi hi ma hi.

¹⁷ Maw Pathian aw, ka piakmi biakpiaknak cu a tamzanmi lungmu hi. A tamzanmi le sual sik lehmi lungmu cu kik awng tukma ci.

¹⁸ Maw Pathian aw, Zion humah hehpihnak nei inna, bawm zalin, Jerusalem khua kulhtiante cu tiangleh zalin hi.

¹⁹ Biakpiaknak le meihal biaknak tei humah Na lungdam tuk a, na biaklandawh humah khuicangte cu biakpiaknakah piak hi haw tuk hi.