SAAM LABU 50 - Ngawm Bible

Biaknak Tatak

¹ Cungnungbel Pathian Topa cu awn hi; Nisuahnak pen nitumnak tian, lei buppi cu sam hi.

² Pathian cu mawinak cangkim a neitu Zion khuapi pen ni bangin vak hi.

³ A Pathian uh cu hung naven mengdenno in hung ma hi. A mailamah mei alh huhum tuk a, a elkimah nase zetin huihpi theu tuk hi.

⁴ A mihingte thu a khen ten theihpihtu tukin lei le van samin,

⁵ “Biakpiaknak pia in keimah tuah thutepnak a bawltu muantak ka mihingte cu ka lakah 1amkhawm un,” ti hi

⁶ Van ten Pathian cu dik hi. Amah cu thukhentu hi, tin aupih haw hi.

⁷ “Maw ka mihingte ngai hem un, awn tung hi. Maw Israel a cangcianin theitik tung. Keimah hi Pathian ing hi, na Pathian uh ing.

⁸ Ka lak a na piak leleng uhmi biakpiaknak le meihal biaknakte hangin nohte liat hi mang.

⁹ Mahnaven na inn uh pen na ken uhmi na khuicang uhte kul viang mang; Na nganhing hon tei lak a na keel uhte vang kul hihim mang.

¹⁰ Itahim titale ngamsa hempoh cu kata hi. Sialcelh ngawl mualhum a nganhingte vang kata hi.

¹¹ Vano hempoh le hampa lakah a nungmi hempoh vang kata hi khawng hi.

¹² Ka ngilkial a hin nohte hilh tuk mang; Itahim titale leihum buppi le, a sung a ummi hempoh cu kata hi.

¹³ Khuicang cik ei ing maw? Keel thi in ing maw?

¹⁴ Na lungdamnak uh hi Pathian lak a na piak uhmi biakpiaknak hi saw hen. Mahten piak tuk tin na tepsa uhmi hempoh cu Cungnungbel lakah pia un.

¹⁵ Haksatnak a hen ten keimah sam unna, nohte cu pan tung hi. Noh ten keimah thangphat tuk uh ci,” ti hi.

¹⁶ Mahnaven mipha ngawl tei lakah Pathian in, “Ka thukham cu ita son leleng nuam uh cim? Ka thutep cu ita sonnuam li uh cim?

¹⁷ Na ngamtat dan uh lep tuk cu nuam ma uh ci Ka thukham cu nung hek khawng uh ci.

¹⁸ Nguca na muh uhten a ngualcamin um uh ci. Mitei zi a sualpihtu tuah phialdun uh ci.

¹⁹ Awn pha ngawl awn tukin zuan ngangzet uh ci. Zolthu son tukin pelh awng ma uh ci.

²⁰ Na unau tei phat ngawlnak zei le sual nawn tukin mansa in um leleng uh ci.

²¹ Hizahta in, na pha ngawl bawl nave uhcin, Kei in imah awn mang. Mah hangin keimah tianin nangmuh bangin ngaisung uh ci. Mahnaven atu-in nun hilh tung. Ciang zetin hilh tung hi.

²² Keimah a simsial ngawl tute Hi thu hi komno in ngai un; Mahma tale, nohte cu siatsuah khawng tung. Kuamah pantu nei tukma uh ci.

²³ Ka lak a lungdamnak na langtik uhmi hi Ka min phatiktu biakpiaknak hi. Ka thu a zuitu hempoh cu pan hihim tung,” ti hi.