SAAM LABU 5 - Ngawm Bible

Humhimnak Tuk Thungetnak

¹ Topa aw, ka otmi hi ngai zal inna, ka taunak hi za zalin hi.

² Ka Kumpi le ka Pathian, bopnak ngenin ka aunak hi, hu ngai zalin! Maw Topa aw, na lakah thungen ing.

³ Zingsialin ka thungetnak cu za ci, ni a suah ten ka thu le late na lakah hen ing a; na don tuk ngakin um ing.

⁴ Sual bawlnakah a lungdamtu Pathian hi ma ci; phat ngawlnak cu na lakah umtik ma ci.

⁵ Mi ultungte cu mu thei ngawlin; mipha ngawl hempoh cu hua ci.

⁶ Zolthu sontu hempoh cu siatsuahin, thisan suah nuamtu le mizol theite cu ningdelh ci.

⁷ Mahnaven a kho mi na itnak a nase leita hangin, kei cu na inn sungah tum tung. Na Biakinn thiangtho sungah nang bia tung a, kihcaknak tuah na mai ah kun tung hi.

⁸ Topa, ka ngalte tamzet haw ven! Na deihmi bawl tukin kei hu pui in; ka zui theihnak tukin ka lamtuangtikin hi.

⁹ Ka ngal tei awnkam cu muantak viang ma; mi siatsuah tuk bek nuam haw hi. A kam haw cu khan kong honmi bangin a lei haw cu nal zetin mizol thiam ngangai haw hi.

¹⁰ Maw Pathian aw, amuhte cu lawl inna, bawlsia in hi. Thusia a vaikup haw cu amuh tei siatlalnakah cangtikin, a sualnak haw a tam hangin le nang a langpang haw hangin, na umnak pen vawktulin hi.

¹¹ Na lak a, himnak a tawktu cu a lung haw dam tuk; lungdamin lasa leleng haw tuk hi. Nangmah a ittute cu hupin; nangmah hangin amuhte cu mi lungdam ngangai mite haw hi.

¹² Topa aw, na thu a ngaitu cu muicu pia inna, na hehpihnak tuah amuhte cu, lumphaw bangin hup ci.