SAAM LABU 49 - Ngawm Bible

Leihum Neihnak Muan Cu Silnak

¹ Mi hempoh ten thei un! Khua hempoh a um mihingte

² Upa nau tale mihau ca-ngah ten ngai hem un.

³ Ka awnkam cu cihnak awnkam hi; Ka ngaihsutnak cu sullam neimi hi.

⁴ Thupaucapnak lamah ka beng hek tung, Phaidaak tumthahin, thu polh mite theiciangtik tung.

⁵ Ka ngal ten kimin, thinsu linglawng hun hei ten lau mang hi.

⁶ A na haw a muangtute le a hauhsaknak haw a tuangkhawngtu ten kei a kim haw hei in imah lau mang.

⁷ Kuamah in mah i nunnak cu pan thei ma hi. Mai nunnak i man cu Pathian lak lul zo tukma hi.

⁸ Itahim titale a nunnak i man cu hak zetin, Thihnak pen patnak ngah tukin le

⁹ Kumkhua nunnak ngah tukin a piak theihmi man hei in tham tukma laih hi.

¹⁰ Kua hei in micipte cu thi in, misilte vang thi leleng haw tih cu mu haw hi. A venghawng haw in, a hauhnak haw cu a casuante zam haw hi.

¹¹ A khan haw cu kumkhua in, a inn haw hi. Mahlai ah kumkhua in um haw hi. Tanglaihin kata uh hi tihmi lei ngam nei haw naven!

¹² Mihing cu a letnakin thihnak pen hup thei tukma hi. Ngamsa bangin paithong haw tuk hi.

¹³ Mah le mah a muangdun copte cu icang haw him tih zo hem un! A hauhsaknak haw tuah lungkim pih zetin, a umtu tei a daldakdan haw khi!

¹⁴ Tuu bangin a thi tuk bekte haw hi. Thihnak cu a muhte cingtu hi tuk hi. Midikte cu amuh nehtu hi haw tuk hi. Thihnak ngamah a luang pumpi haw muat tuk hi.

¹⁵ Pathian in kei cu hup tuk hi; Thihnak huham sung pen kei pan suak tuk hi;

¹⁶ Mi pa kha khat cu hau dedeuhin, a hauhnak cu a pung dedeuh ten na thasia pahsun.

¹⁷ A thih ten imah keng thei tukma hi; A hauhsaknakin khanah zui thei tukma hi.

¹⁸ Mi pa kha khat leihumah a lawhting hangin, Ultung tuangkhawng pihzet haw in, leihum nunnakah lungmuannak a ngah vangin,

¹⁹ thihnak a tawh ten kumkhua thimnak munah a pu le a pate zui leng haw tuk hi.

²⁰ Mihing cu a hauhsaknakin thihnak pen hup thei tukma hi. Ngamsa bangin paithong bok tuk hi.