SAAM LABU 48 - Ngawm Bible

Pathian Khuapi Zion

¹ Topa cu thawmngeng zetin, a Pathian uh i khuapi le a mual thiangtho humah, nase zetin thangphat tuk hi.

² Pathian i mual, Zion cu sangin mawi vang mawizet hi. Kumpi khuapi in leihumah lungdamnak hengtik hi.

³ Pathian in mah khuapi sung, a umnak kulhtian sungah, Himnak um hi tih cu langtik zo hi.

⁴ Kumpite munkhatah tawkdun haw in, Zion mual do tukin hung haw hi.

⁵ Mahnaven Zion mual amuh haw ten lamdang sazet haw; Lau in tai khawng haw hi.

⁶ Nauhing kuan numei bangin, launak le thinsuknak tuah dim hi.

⁷ Pathian in Tarshish timbaw ngengpite, nisuahnak lam huih mangin a timbaw siattik khawng hi.

⁸ Cungnungbel Topa, a Pathian uhin, a khuapi sungah na bawl mite thei zo hung; Tu in, a mit uhin mu leleu hung; Amah in, a khuapi cu kumkhua in hup tuk hi.

⁹ Maw Pathian aw, na Biakinn sungah a kho mi na ihnak cu ngaisung mek ung.

¹⁰ Nang cu leihum khua hempoh ten pahcawi haw in na min cu lei buppi ah thang hi. Diknak tuah ngampi uk ci.

¹¹ Zion a mihingte a lung haw dam tahen. Na thukhennak cu dik hi. Judah khuapi tei lakah lungdamnak um tahen.

¹² Pathian i mihingte, Zion mual kimin hawh unna, tausangpite khi sialteh un.

¹³ A pangte komno in zo unna, khangthak tei lakah na hilh tukin a ngal kulhtiante cu zo teh hem un.

¹⁴ “Hi Pathian cu kumkhua pen kumkhua tian, a Pathian uh hi. Kumkhua in amah in pui tuk hi.”