SAAM LABU 45 - Ngawm Bible

Kumpi Zihuainak La

¹ Ka lungmu sungah awn pha le awn mawi tuah dim hi; Kumpi ca in, la ka phuah ten ka lei cu laingan thiam pa i laikung bang hi.

² Nang cu pano hempoh lak pen a piangbel ci. Kam thiamzet na hih hangin Pathian in muicu pia leleng hi.

³ Maw kumpi Bawipa, na tai ah na namsau khaihin; nang cu huham nei le mi sunglawi ci.

⁴ Thudik le thuman lam tanpih tukin, na ngilnak tuah nehnakah hawhin! Na ngilnakin nehnak tampi pia tuk hi.

⁵ Na thalcang cu hiam ngangai in, na ngal tei thin cu sun let hi. Miphun tampi cu na ke bulah lum haw tuk hi.

⁶ Pathian i piakmi kumpi khunnak cu kumkhua pen kumkhua tian kho tuk hi. Na uknak cu diknak tuah uk ci.

⁷ A manmi cu deih ci a, a pha ngawl cu hua ci. Mah hangin Topa na Pathian in nang cu teng zo hi. Midang hempoh sangin na humah lungdamnak cu buaksuk zo hi.

⁸ Na puante cu mura zimui, aloes namtui le Kassia zimuite noihmi hi a nam helhul hi. Saiho tuah lam mi kumpi innah la thiam ten la tuah awi haw hi.

⁹ Na umnak innpi sung a ummi numeite cu kumpi canute hi. Na kumpi khunnak i taklamah Ofir ngam a, sui phabel a thuamtu kumpinu um hi.

¹⁰ Maw kumpipa i khanglai ka hilhmi hi theihpih zalin hi. Na mihing le na innkuate phawkngil hihin hi.

¹¹ Na mawi hangin kumpi pa in deih tuk hi. Na bawi a hih hangin a thu cu ngai in hi.

¹² Taiar khua numei ten laksawng pia haw tuk hi. Mihau ten nangma bop tuk deihin, a sum haw mang haw tuk hi.

¹³ Kumpi canu cu kumpi inn sungah um hi. Khanglai mawizet hi! A puansilhte cu sui nimzang tuah takmi hi.

¹⁴ A pian aile a de selsulmi puan mawizet silhin, kumpi lakah hawhpih haw in, amah cingtu numei ten zui haw hi. Amuhte vang bawipa i lakah hawh bok haw hi.

¹⁵ Lungdam thatui zetin hawh haw in, kumpi inn sungah tum haw hi.

¹⁶ Maw ka kumpi, capa tampi nei tuk ci. Na pu le pa tei i hi haw tuk hi. leihum buppi uktu in bawl tuk ci.

¹⁷ Hi ka la phuahmi hin na min cu kumkhua in nungtik tuk hi. Mi hempohin nangmah cu kumkhua in thangphat haw tuk hi.