SAAM LABU 44 - Ngawm Bible

Himnak Tuk Thunget

¹ Maw Pathian aw, ka beng uhin za zo ung, tanglaih a, nalamdang na bawlmite cu ka pu le pa uhten hilh zo haw hi.

² Nangmah in Pathian thei ngawlte cu hawlvawkin, na mihingte ngam luahtu in, na bawl! Mi phundangte cu dantat navecin, na mihingte mi neinungin, bawl ci!

³ Na miphun ten hi ngam cu a ngalnam haw in a nehmi haw hei hi ma hi. Na thawm le na ngilnak amu lak na um lelengnak le, na ihnak a lak haw a, na langtiknak hangin neh haw hi.

⁴ Nangmah cu ka kumpi le ka Pathian hi ci. Na mihing tei lakah ngalnehnak pia ci.

⁵ Na hu le thawm tuah ngalte neh ung. Ka lak uhah na um hangin keimuh dotute cu hawlvawk ung.

⁶ Ka thalcang hi muang mang, ka ngalnam hei in, kei pan thei ma.

⁷ Ka ngal tei khut pen na hup zo hangin keimah a huatute cu neh zo ci.

⁸ Nangmah cu thangphat tuk ung. Kumkhua in pahcawi tuk ung.

⁹ Mahnaven nangin zamsanin, ka ngal ten nehleh hawta hi; ka ngalkap tei lakah hawh ma toh ci.

¹⁰ Ka ngal tei mai pen taitik zo ci, ka ngal uhten ka na uhte sut khawng zo haw hi.

¹¹ Tuu bangin thah khawng tuk phal zo ci. Ngam dadangah khenkhek khawng zo ci.

¹² Na mihingte cu zuak ci a, aman haw na ngetmi cu sontak ma hi. Na zuakmi manin, a met imah ngah cuang ma ci.

¹³ Ka hum uh a na bawl mite hi, ka innnel ten amuh haw ten, zawnsakin nuihsan haw hi.

¹⁴ Miphun tampi tei lak pen nautatmi, miphunin suakta ung. Nautat zotsaknak tuah a lu haw thing li haw hi.

¹⁵ Kei a deih ngawltu le ka ngal tei lak pen, zotsaknak le sonsiatnak ka theih hangin,

¹⁶ zahcaknakin puanin khuhin, mualpho in um leleng ing.

¹⁷ Nang cu phawkngil ma ung, keimah tuah na thutepnakte siatsuah ma nave ung, hiti bang nate ka hum uhah heng hi.

¹⁸ Ka lungmu uh hawkdak ma ung; na thupiak ngai ngawlin um awng ma ung.

¹⁹ Mahnaven kuamah bawmtu nei ngawlin, ngamsa tei lakah zamsanin, thihnak khuathim lakah vawkin zam ci.

²⁰ Ka Pathian biak uh cawlin, ngamdang tei pathian nelah thu ka ngen uh bang ahin,

²¹ Nangmah in thei khawng zo ci. Itahim titale nang cu mihing tei ngaihsut kuhmite a thei khawngtu ci.

²² Mahnaven nangma hangin thahnak thuak ung, thah tukmi tuu bangin ngaihsutmi hi ung.

²³ Topa aw, khanglo tohin! Itakaw na hihbuh leleng? Tho inna! kumkhua in lawl pahsun.

²⁴ Ita ka lak uh pen ngelh leleng cim? Ka haksatnak uh le ka thuaknak uhte hi phawkngil pahsun.

²⁵ Lei humah sihpekmi hi ung hi. Ngal ten nehin leivul lakah lum ung.

²⁶ Tho inna, bawmin hi. Na ih hangin hu pan zalin!