SAAM LABU 41 - Ngawm Bible

Damnak Tuk Thunget

¹ Mi ca-ngah a ngaihsaktu cu mi muicu hi. A haksat haw ten Topa in bawm tuk hi.

² Topa in cingkem tuk a, nunnak hup tuk hi. Hi ngam sungah mi lungdam hitik tuk hi; A ngal tei khut sungah zamthong tukma hi.

³ A nat ten Topa in bawm tuk hi. Damtikleh tuk hi.

⁴ Topa i lakah, “Topa aw, na humah sual zo ing. Kei hehpih zal inna, damtik zalin,” ti ing.

⁵ Ka ngal ten ka thu cu a selam ngehin son haw hi. “Ituk ten thi in, ituk ten a min a paih khawng tuk?” ti haw hi.

⁶ Keimah a vehtute cu thin thiang lung thiangmi hi haw ma hi. Ka humah thusia bebek zei haw in, A kihleh haw ten khua hempoh ah son haw hi.

⁷ Kei a huatu ten ka thu bebek son kuh haw hi. Ka ca in, a siabel tianin ngaisung haw hi.

⁸ Amuh ten, “Nasezet na in, a zaunak pen tholeh tukma toh,” tin ti haw hi.

⁹ Ka ngualcam phabel, ka muanbel mi le an ka eihpihtu in keimah langpang zo hi.

¹⁰ Topa aw, ka ngalte ka lulhleh theihnak tukin, kei hehpihin damtik zalin hi.

¹¹ Ka ngal ten a neh haw ma tale ka humah na lungdam hi tih thei tung hi.

¹² A manmi ka bawl hangin nangmah in bawm tuk ci a, kumkhua in, na lakah umtik tuk ci.

¹³ Topa Israel i Pathian cu thangphat un. Amah cu tu le kumkhua in thangphat un. Amen, Amen!