SAAM LABU 40 - Ngawm Bible

Thangphatnak La

¹ Topa i bopnak cu ngak leleng ing, ka aw cu ngai in, ka aunak cu za hi.

² A lauhuai khuk thukzet sung pen kei doksuahin; cinciak tuah dimmi khuk sung pen suangpi humah himno dingtikin, lungmuang zetin koih hi.

³ Pathian thangphatnak la thak sa tukin zilh hi. Mahtibang bawlmi a mutu hempoh ten, Topa cu kihca in muang haw tuk hi.

⁴ Milim le pathian sual bia ngawlin le mi pualthau le mizol theite phial ngawlin, Topa a muangtute cu mi muicute hi haw hi.

⁵ Maw Topa ka Pathian aw, kohtei ca in, na tampi bawl zo ci. Nangmah bang kuamah um haw ma. Kohtei ca in thasiahhuai tuptahmi nei ci. A venghawngin ka hilh khawng nuam hei in, hilh ceng tuk mang.

⁶ Biaklandawh hum a, nganhing biakpiaknakte cu na deihmi kha ma hi. Halkang biakpiaknak hei, na ngetmi hi kha ma. Sualhahnak tukin biakpiaknak hei, na lungdammi hi ma hi. Mah sangin, na thu ka zak theihnak tukin beng pia ci.

⁷ Na lakah, “Hilai ah um ing. Ka ca in, na thuzilhmite cu Daan laibu sungah um hi.

⁸ Ka Pathian na deihnak zui tuk cu, itih zahin kaw ka nuam! Na thupiakmi cu ka lungmu sungah vong ing,” tin ti ing.

⁹ Topa aw, na mihing tei khawmnak munah na nunpatnak thuthangpha son tung. Mahtin ka son cu cawl awng tuk mang, tih cu thei ci.

¹⁰ Na patnak thuthang cu keima lak bekah koih mang. Muantak na hihnak le na bopnak cu hilh leleng tung. A kho mi na ihnak le muantak na hihnak cu, na mihing tei tawhdun khawmnak munah mengdenin umpih thong mang.

¹¹ Topa aw, ka hum a, khaw-ngaihnak na neihmi cu bo awng tukma, tin um ing. Na ihnak le na diknakin kei hup leleng tuk hi.

Bopnak Tuk Thunget

¹² Sialcelh ngawl haksatnak tampi ten kiilcihin, ka sualnakin keimah man ngahin, khua hei mu thei mang. Mah sualnakte cu ka lu hum a, samzang sang tam saw in, ka thinsu zo hi.

¹³ Topa aw, kei hu pan inna, tu in bawm zalin hi.

¹⁴ Keimah thah a tum litute cu zakca in le lungsilin um haw tahen. Haksat ka tawh ten a lungdamtute cu Nunglamah kikleh hen na, mualpho tahen.

¹⁵ Cekpan bawlnakin, a mangtute cu a sun haw hangin zakca in um haw hen.

¹⁶ Na lak a hung mite cu lungdam le thatui in um haw hen. Na nunpatnak a deihtu ten, “Topa a thawmngeng hi,” tin ti leleng haw tahen.

¹⁷ Kei cu mi haksa le thinkhammi ing. Mahnaven Topa, nangin kei hi sehelhzet ci. Nang cu keimah bawmtu le pantu hi ci. Maw Pathian aw, manlangin hu bawmin!