SAAM LABU 39 - Ngawm Bible

Haksatnak A Thuaktu i Sual Phuannak

¹ Ka lungmu sungno in, “Ka thil bawlmi ah ngalling tung; ka lei in sualtik pahsuh hen. Ka ngalte ka elah a um sung haw cu imah awn tuk mang,” tin ti ing.

² Mengdenin, kam khatno hei awn ngawlin le thilpha hei son ngawlin ka um ten, ka haksat thuaknak cu luai dedeuhin,

³ ka lungmu tamzet hi. Tamdeuhin thu ka ngaihsut ten, ka haksatnak tam dedeuh, mah hangin Pathian nelah,

⁴ “Topa aw, ituk tian kaw ka nuntuk? Thi tuk mang maw? Ka nunnak a com dan hi, hu theitik zalin,” tin dong ngawlin um thei mang hi.

⁵ Ka nunnak hi khap khat bek thong hi. Na mai ah ka ngamtat hi imah son tham ma hi. Mihing nunnak cu a haihawh uhmi huih bek hi.

⁶ Alim uh bang thong hi. A dehmi hempoh cu a thawnthong suak khawng hi. Neih le lam cum pepel naven a cotu tuk ngangai thei ma hi.

⁷ Mahtin ahi tale maw Topa, ikaw muansan tuk ka neih? Ka muansanmi cu nangmah bek ci.

⁸ Ka sualnak hempoh sung pen luattik inna, misil tei cekpan bawlnakin cangtik pahsun.

⁹ Hitihzah haksat thuak tukin kei na bawl hangin mengdenin um tung; kam khat hei awn tuk mang.

¹⁰ Kei bawlsia toh pahsun. Na vah hangin thi awn toh ing.

¹¹ Mihing sualnak cu dantatnak tuah lulleh ci, a sunsakmi na hempoh cu, leikhalawn bangin siatsuah khawng ci. Mihing cu haihawh huupmi huih bangthong hi.

¹² Topa aw, ka thungetnak zaksak zal inna, ka ngetmi hi theihsak zalin hi. Na lakah ka kah ten mengdenin zamsan thong pahsun. Ka pu le pate bangin kei hi hun comno sung bek na mikhual ing.

¹³ Hi leihum hi zamsanin ka umleh ngawl toh hun, a hen deuh laih ngawlin lungdamin ka um theihnak tukin khawih zalin hi.