SAAM LABU 37 - Ngawm Bible

Mi Pha Ngawl le Mi Pha Tei Hennak Tuk Mun

¹ Mipha ngawl a um haw hangin ngaihsut hakin um pahsun. Sualnak a bawl haw mite vang hawza pahsun.

² Amuhte cu a ko mi hampa bangin paithong haw tuk hi, Hampa thim bangin thi haw tuk hi.

³ Topa cu muang inna, thilpha bawlin hi. Hi ngam sungah himdamno in um tuk ci.

⁴ Topa i lakah lungdamnak zei inna, na deihmi pia tuk hi.

⁵ Topa i lakah na nunnak apin: amah muang inna, nangmah bawm tuk hi.

⁶ Na phatnak cu khuavak bangin vaktik tuk a, na diknak cu sun ni vak bangin vaktik tuk hi.

⁷ Topa i mai ah cingdenno in ngak inna, ama na cu thinsau zetin ngakin hi. Mi neinung a hih haw hangin lauthawngin um pahsun. Thil pha ngawl bawl tei a lawhtin haw ten lauthawng pahsun.

⁸ Na thinuk pahsun! Na lungmu hei tam pahsun; haksatnakah hehpih tuk hi!

⁹ Topa a muangtu cu hi ngam sungah ngimta zetin um haw tuk hi. Mahnaven mipha ngawlte cu hawlvawk co haw tuk hi.

¹⁰ A ngeican um ngawlin mipha ngawlte cu thamthong haw tuk hi. Na zei vangin mu tukma toh ci.

¹¹ Mahnaven mi lungnem ten, hi ngam cu luahin, lemdaihnak tuah ngimta zetin khangto haw tuk hi.

¹² Mipha ngawlin mipha cu suamin, huatnak mit tuah zo hi.

¹³ Topa in mipha ngawl cu nuihsan hi. Lalthong paih haw tuk tih thei hi.

¹⁴ Mipha ngawlin, a ngalnam haw dokin, a thalcang haw kau haw; mi ca-ngah le mi haksate thah tum haw in, mipha le midikte thah khawng tum haw hi.

¹⁵ Mahnaven amu manmi ngalnam tuah amuhte cu dawh co haw tuk a, a thalcang haw cu ektuah khawng tuk hi.

¹⁶ Mipha ngawl tei neihmi thil tampi sangin, Mipha tei neihmi thil dawmno cu man nei saw hi.

¹⁷ Itahim titale Topa in, mipha ngawl tei ngilnak cu siatsuah tuk a, miphate cu hup tuk hi.

¹⁸ Topa in, ama thu a zuitute cu cingkemin, hi ngam cu kumkhua in amuh ta hituk hi.

¹⁹ Haksatnak hun a hen ten haksatnak thuak haw tukma hi. Paam a heng hei in, khamkhop ngah leleng haw tuk hi.

²⁰ Mahnaven mipha ngawlte cu thamthong haw tuk hi, Topa a dotute cu hampa lak pak bangin le meikhu bangin thamthong haw tuk hi.

²¹ Mipha ngawlin mitei thil pu in lohleh ma hi. Mahnaven mipha cu mi hehpihin lawithiam hi.

²² Topa i muicu piakmi ten hi ngam cu luah haw tuk hi. Mahnaven a tamsiat mite cu thamthong haw tuk hi.

²³ Mihing tei hawhnak lampi cu, Topa in selhsakin, a deihnak bangin a ngamta tei humah a lungdam hi.

²⁴ A bah vangin lumvawk tukma hi, Itahim titale Topa in phongleh tuk hi.

²⁵ Ka neulaih pepan ka tek tian, Topa in mipha a taisan mu awng mang. A cate vang an a nget haw lam mu awng mang.

²⁶ I hun bang hun hei in phalzet pia in, coih hi, A cate cu a muicu in cang haw hi.

²⁷ Siatnak cu taisan inna, phatnak bawlin, Mah ahi tale hi ngam sungah kumkhua in um tuk ci.

²⁸ Itahim titale Topa in, a thudik deihin, amah a muangtute cu nunghek ma hi. Amuhte cu kumkhua in hup hi. Mahnaven mipha ngawl tei canaute cu lalthong haw tuk hi.

²⁹ Midikcang ten hi ngam cu luahin, ngimta zetin kumkhua in um haw tuk hi.

³⁰ Mipha tei awnkam cu cihnak awnkam hi; a hilhmi cu a lamcam hi.

³¹ Pathian i daan cu a lungmu sungah koihin; ituk mahten pialsan awng ma hi.

³² Mipha ngawlin mipha cu zo kuh lelengin thah tum hi.

³³ Mahnaven Topa in, a ngal tei khut sungah zamthong tukma hi, A thu a son haw hei ten zamsan tukma hi.

³⁴ Na muansannak uh cu Topa i lakah koih unna, a thupiakmite zui un. Hi ngam co theihnak thazaang pia tuk hi. Mipha ngawlte siatsuah khawng a hih haw cu mu tuk ci.

³⁵ Mipha ngawl pa khat thunei theizet le ultung theizet mu awng ing; Lebanon a sidar thingkung bangin midang sangin sang saw deuhin koih cawm hi.

³⁶ Mahnaven a nung ka zohleh ten umleh ma toh hi. Ka zei vangin mu lehma toh ing.

³⁷ Mipha cu zo hem un, midikcang cu zo cian hem un, mi taituang ten canau tampi nei haw hi.

³⁸ Mahnaven mipha ngawlte cu siatsuah khawng hi haw in, a canau haw cu cimit khawng haw hi.

³⁹ Midikcang tei patnak cu Topa i lak pen hung hi. Haksat hun ten a buknak haw suangpi hi.

⁴⁰ Topa in amuhte cu bawmin pan hi. A nelah beltukin a zot haw hangin, mipha ngawl tei khut pen humhim hi.