SAAM LABU 31 - Ngawm Bible

Pathian Muangin Thungetnak

¹ Topa aw, na lakah belhnak zei in hung ing, zakca in umtik pahsun. Nang cu a dikmi Pathian na hih hangin, kei hu pan zalin hi.

² Ka ngetmi aw za in manlangin kei hu pan zalin, ka belhnak suangpi hi inna, kei hu hup zalin hi. Ka kulhtian hi inna, kei pan zalin hi.

³ Nang cu ka belhmi suangpi ka kulhtian hi ci. Na tepsa bangin, kei cing inna, lampui zalin hi.

⁴ Keimah a siahmi thang pen luattik zalin hi. Nang cu ka belhmi hi ci.

⁵ Ka nunnak cu na khut sungah koih ing. Topa aw, nangmah in kei hup zalin; Nang cu muantak Pathian hi ci.

⁶ Milim biak cu hua ci. Mahnaven kei in nangmah muang ing.

⁷ A khohmi na ihnak hangin, Ka lungdam tung a, ka thatui tung hi. Ka thuak daante mu in, ka haksat daante thei ci.

⁸ Ka ngal tei khut sungah hengtik ma ci. Ka nuamnakah ka deih bangin hawh ing.

⁹ Topa aw, ka humah hehpihnak nei zalin, thinkham zetin um ing. Ka kahnakin ka mit bum khawngin, ka tha bo khawng zo hi.

¹⁰ Lungsiatnak hang ka tha bo hi. Ka kahnakin ka khancom hi. Haksat ka thuaknak hangin ka thanem hi. Ka nguh cawmin muat hi.

¹¹ Ka ngal ten cekpan bawlnakin mang haw, ka innnel ten nuihsanin, A theitu ten keimah lau haw, Lampi ah keimah amuh haw ten tai haw hi.

¹² Kuamah in kei thei haw ma toh, Mithi bangin ngaisung haw hi. Beelkeh vawkmi bang ing.

¹³ Ka ngal tei thu kuh a sonmi haw thei ing. Ka elkim cu thinsuknak tuah dim hi. Keimah that tukin sawm haw, Keimah thah tum haw hi.

¹⁴ Mahnaven maw Topa, Ka muanmi cu nangmah hi ci. Nang cu ka Pathian ci.

¹⁵ Ka ihempoh na khutah um hi, Ka ngalte le keimah a bawlsiatu tei khut pen hup zalin hi.

¹⁶ Kei cu na sila ing. Hehpih ningnatnak tuah kei zo zalin hi. A khohmi na ihnakin kei hu panin hi.

¹⁷ Maw Topa, nang sam ing, zahcaknakah hengtik zal pahsun. Mipha ngawlte cu zakca haw tahen; Mithi ngamah ot tuk nei ngawlin um haw tahen.

¹⁸ Mi ultungte le mi pualthaute, zotsaknak tuah mipha tei thu a sontu le, Zolthu a sonnak haw kam cu bin zalin hi.

¹⁹ Nangmah a kihcatu tei ca in, Na khawlsa mi thilpha a tam daan cu! Nangmah a muangtute na hupnak thu, Mi hempoh mitmuhah a mawidan cu!

²⁰ Na ha nuai ah himno in koih ci, Miphial sawmnak pen luat haw hi. Na hupnak kua sungah himno in sel ci. A ngal tei zotsaknak pen luat haw hi.

²¹ Topa cu thangphat hi tahen. Ka ap vansan laihin, ka elkimah um hi. Kei na ihnak na langtikdan hi thasiahhuai hi!

²² Lauthawng thah zetin, “A umnak pen kei vawk zo hi tuk,” tin ngaisung ing. Mahnaven bopnak ngenin ka sam ten, ka aunak aw cu za leleng ci.

²³ Muantak mite, Topa cu it un, Amah a muangtute cu Topa in humhim hi. Mi ultungte cu nase zetin dantat hi.

²⁴ Topa ah muansannak a neitute, ngilzet unna, ngalpha zetin um un hi.