SAAM LABU 30 - Ngawm Bible

Lungdamnak Thunget

¹ Topa aw, kei pan zo ci a, ka ngal tei thincimmi ka hih ngawl hangin, nangmah cu thangphat ing.

² Maw Topa ka Pathian aw, na lakah, bopnak ngenin au ing a, nangmah in damtik hi ci.

³ Topa aw, mithi khua pen nangmah in kik lehtik ci. Thihnak khuk sungah caak naveng, nangmah in thi ngawlin ka nunnak cu hupsuakleh ci.

⁴ Maw muantak a mi Thiangthote, Topa cu lasa in thangphat un. Thiangthobel Pa i bawlmi cu phawk unna, a lakah lungdamnak pia un.

⁵ A thinuknak cu mitphelep sung bek ngei hi; Mahnaven a phatnak cu khan phaat hi. Zanlamin kahnak a um hei in, zinglamin lungdamnak heng hi.

⁶ Keimah le keimah ka muanduncop ten ka lungmu sungno in, “Nehmi hi tukma toh ing,” tin ti cop ing.

⁷ Topa aw, ka humah phazet ci. Mualhum a, ngal kulhtian sung um bangin himno in koih ci. Keimuh nung na hek ten ka lungmu cu launak tuah dim hi.

⁸ Topa, nangmah sam ing hi, na bop tuk kun ing.

⁹ Ka thi tale na ca in, phatnak ite um tuk him? Mithi khanah ka hawh tale ikaw na nemcuam tuk? Mi thi ten thangphat haw tuk maw? A bo awng ngawlmi na phatnak cu phuang thei haw maw?

¹⁰ Topa aw, za inna, hehpih zalin hi. Topa, keimah bawmtu hi zalin hi.

¹¹ Ka thasiatnak cu lungdam lamnak tuah theksak zo ci. Ka thasiatnak thangkhau puan cu duhsakin, lungdamnak puan silhtik zo ci.

¹² Mah hangin umden thei mang, nangmah thangphatnak lasa tung. Topa aw, nangmah cu ka Pathian hi ci. Na lakah lungdamnak kumkhua in hilh tung hi.