SAAM LABU 27 - Ngawm Bible

Thangphat Thungetnak

¹ Topa cu ka vaknak le ka nunpatnak hi; akua him ka lau tuk? Topa cu ka belhmi suangpi hi, imah lau tuk mang.

² Mipha ngawl ten kei do in, thah a tum haw ten, amuhleh lam bahin, lum haw hi.

³ Ngalkap bupi ten kei a umcih haw hei in, lau tuk mang hi. Ka ngal ten a nawtvawk li haw hei in, Pathian cu muang leleng tung hi.

⁴ Topa i lakah na pa khat ngen ing, mah na pa khat bek cu ka kinmi hi. Topa i inn sungah a mawinak zo tukin le a lampuinak ngen tukin, ka nun sung hempoh um nuam ing.

⁵ Haksat hun ten a buk sungah kei sel tuk hi. A Biakinn sungah himno in kei humhim tuk hi; A sangmi suangpi humah ngimta zetin kei umtik tuk hi.

⁶ Lungdamnak tuah au thahin, ka el a ummi ka ngalte cu neh tung hi. A biakinn sungah biakpiaknak pia tung a, lasa in, Topa cu thangphat tung hi.

⁷ Topa aw, ka sam ten za zalin! kei hu hehpih inna, donleh zalin!

⁸ “Ka nelah hungin hu bia in,” ti in, na thupiaknak bangin Topa aw, na nelah zuan tung hi.

⁹ Keimah nunghek hihim pahsun. Ka humah thinuk ngawlin, na sila hi, kihsan pahsun. Nang cu keimah bawmtu hi leleng ci, Maw Pathian aw, kei pantu, kei zamthongin, nung hek hihim pahsun.

¹⁰ Ka nu le ka pa ten, kei nung a hek haw hei in, Topa in komno in kem tuk hi.

¹¹ Topa aw, na bawltik nuamte hu zilh inna, a dikmi lampi ah kei hu pui in hi. Itahim titale ka ngalte cu tamzet haw hi.

¹² Zolthu le mitawhnak tuah bekin, kei a dotu ka ngal tei lakah kei hu zamthong pahsun.

¹³ A nungmi tei ngamah Topa i phatnak cu mu tung hi tin um ing.

¹⁴ Topa cu muang un hi. Upnak nei in ngalpha zetin um un. Topa cu muang un hi.