SAAM LABU 22 - Ngawm Bible

Vansannak le Thangphatnak La

¹ Ka Pathian, ka Pathian, Ita kei zamsan cim? Bopnak ngenin ka au lih laihtakin, ita khawlapi ah um cim?

² Maw ka Pathian, sunlamin nangmah sam naveng don ma ci. Zanlam vangin au li naveng, colhdamnak ngah cuang mang.

³ Mahnaven nang cu Thiangtho in, kumpi khunnak humah khung ci; Israel tei la tuah a thangphat haw mi hi ci.

⁴ Ka pu pa ten nang cu muang haw hi. Nang cu muang haw in, a muhte cu pan ci.

⁵ Nangmah sam haw in, thinsuk linglawngnak pen luat haw hi; Nang cu muang haw in mualpho haw ma hi.

⁶ Mahnaven kei cu mihing hi lehma toh ing, tenghol poh ing. Mi hempoh tei zotsakmi le nuihcipmi ing.

⁷ Kei a mutu hempohin cekpan bawlnak mang haw hi. A Lei haw siakin, a mitphen haw hi.

⁸ “Topa muang sisi; ita nang pan ngawl kaw? Topa in nang a deih tale itakaw a bop ngawl?” tin ti haw hi.

⁹ Ka nui pum sung pen damno a hingtiktu cu nangmah hi ci; Ka nui nawitui ka inlaih hei in hi. Himdamno in, a cingkhawitu cu nangmah hi ci.

¹⁰ Ka suah bek ten nangmah muang ing; Ka suah pepan nangmah cu ka Pathian hi ci.

¹¹ Ka lak pen tai pahsun; haksatnak ka elah heng, kuamah bawmtu nei mang hi.

¹² Ngal tampi ten khuicang bangin kei kilin, ka elah um khawng haw hi. Bashan ngam a khuicang hang bang haw hi.

¹³ Kiosa bangin a kamka haw, thumin, botkek tum haw hi.

¹⁴ Ka tha bo hi. Leiko hum a tui caak bangin, ka tha nem dikdek hi. Ka lungmu cu mei el a, khuainun bangin, ka sungah zung khawng hi.

¹⁵ Ka dang cu beellei bangin ko in, ka lei cu ka dangah kopto hi. Nangin, a thi zo heng sa in, leivul lakah zamthong ci.

¹⁶ Uicote cu ka elah um haw hi. Mipha ngawl ten kei kilcih haw in, ka khut le ka kete sun let khawng haw hi.

¹⁷ Ka nguhte lang khawng hi, ka ngal ten zo in, angzet haw hi.

¹⁸ Ka puansilhte semdunin, ka angki cual ngah tukin aisan haw hi.

¹⁹ Topa aw, ka lak pen hu tai zal pahsun! Kei pantu manlangin hung inna, kei hu bawmin hi.

²⁰ Ngalnam lak pen kei pan inna, ka nunnak cu hi uico tei lak pen hei hup zalin hi.

²¹ Hi kiosa tei kam sung pen kei hu suahin; a hang zetmi khuicang tei ki pen, pan tul zo ci.

²² Na bawlmi hempoh hi ka hinnam tei lakah hilh tung; A khawpdunnak haw pen nang thangphat tung.

²³ “Topa i silate, amah cu thangphat un! Jakob i casuante, amah cu upat un! Israel miphunte, amah cu bia un!

²⁴ Mi ca-ngahte zamthong ngawlin, mi haksa tei thuaknakte zamsan thong ma hi. Mahnaven bopnak ngenin, a au haw ten, don mek hi,” tin ti tung.

²⁵ Na thil bawlmi hangin, a khawmnak mun haw pen nang thangphat tung. Biakpiaknak pia tukin ka tepsa bangin, nangmah a kihcatu tei mai ah pia tung hi.

²⁶ Mi ca-ngah ten a deihzahin ei haw tuk hi; Topa i lakah a hungmi ten amah cu thangphat haw hi. Lungdam thatui in um leleng haw tahen.

²⁷ Minam hempoh ten, Topa cu theileh haw tuk a, vanhaang nuai hempoh ten a lakah kik haw tuk hi. Miphun hempoh le hinnam hempoh ten amah bia haw tuk hi.

²⁸ Topa cu kumpi hi in, minam hempoh uk hi.

²⁹ Mi ultung tuangkhawng le mihaute a mai ah bok haw tuk hi. A thi thei mi mihing hempoh le mahno in, a nungleh duntik thei ngawlte cu a mai ah kun haw tuk hi.

³⁰ A casuan haw ten, Topa i na dek haw tuk hi. A heng tukmi khang hei ah, Topa i thu cu hilh haw tuk hi.

³¹ “A piang tuk laihmi tei lakah, Topa in, a mihingte pan hi,” tin hilh haw tuk hi.