SAAM LABU 19 - Ngawm Bible

Semsuahmi Humah Pathian Sunloihnak

¹ Van in, Pathian sunloihnak hilh haw in, vanhaang nuai in, a khut suak langtik haw hi.

² Sun in, sun i lakah thu hilhin, zanin zan i lakah theihnak hengtik hi.

³ Awnkam mang haw ma, aw hei suah haw ma, thawmnging imah theih hi ma hi.

⁴ Mahnaven a aw haw cu leihum khua hempoh ah thang hi. A thu that haw mi cu van mawk tian khong hi. Vanah khin Pathian in ni ca in puan buk zaksak hi.

⁵ Ni cu a inn pen moneitu tangval pa bangin tul hi. Tai zuamdunnak a teltu tangval pa bangin,

⁶ Vanmawk langkhat pepanin, langkhat lam tian kimin tai hi. A satnak pen kuamah a ngelh theitu um haw ma hi.

Topa i Daan Thukham

⁷ Topa i daan thukham cu cangkimin nunnak thaktiktu hi. Topa i thupiakmite cu muantakin A cip ngawlte cihnak piatu hi.

⁸ Topa i daan thukhamte cu a dik zetmi hi in, A zuitu tei ca in lungdamnak hi. A thukhamte cu dikzetin lungmu mitvaktiktu hi

⁹ Topa kihcaknak cu thiangtho in, Kumkhua in kho leleng hi. Topa i thukhennak cu dikin, a dik lelengmi hi.

¹⁰ Sui sangin le sui phabel sangin deih awh saw hi. Khuaitui ngek sangin le khuaiphang pen a cakmi khuaitui sangin hum saw laih hi.

¹¹ Na sila kei ciptikin, na daan thukham zui cu nemcuamnak ngengpi hi.

¹² Mai khelhnak a thei theitu akua um him? Kua ma theih ngawlmi ka sualnak pen thiangtikin hi.

¹³ Bawlhim sualnak hei pen kei humhim inna, keimah uktu in cang zal pahsuh hen. Mi cangkim hi tung a, ningdelhhuai sualnak pen luat tung hi;

¹⁴ Ka muk le kam pen a tulmi awnkam le ka lungmu ngaihsutnakte hi, Maw Topa na mai ah santakmi hi zal hen. Ka belhmi suangpi le kei pantu!