SAAM LABU 18 - Ngawm Bible

David Nehnak La

¹ Topa aw, Itih zahin kaw nang ka deih hi! Nang cu ka ngilnak hi ci.

² Topa cu keimah pantu le a khomi suangpi ka kulhtian hi. Ka Pathian cu ka belhmi suangpi hi; Aman lumphol bangin keimah cu khamsak hi. Ama sungah him ing.

³ Topa cu sam ing a, ka ngal tei khut sung pen suakcatik hi. Topa cu thangphat un.

⁴ Thihnak khauhualin vialin, siatnak tuilunin kei khuh hi.

⁵ Thihnak khauhualin kei awkin, khaanin thangsiah hi.

⁶ Haksatnak ka tawh laihin, Topa cu sam ing. Bop tuk deihin ka Pathian cu sam ing. A biakinn pen ka aw cu thei hi; Ka aunak aw cu a beng sungah tum hi.

⁷ Pathian a thin a uk hangin, leipi cu hingin can hi. Mual hempoh tei khunnak bul tawphah cu hingin can tawtok haw hi.

⁸ A naalkua pen meikhu tul lulutin, a kam pen mei alh le meithem tul zuazuak hi.

⁹ Van cu hongin tolhsuk hi. Meingo sahzet a ke nuai ah um hi.

¹⁰ Cherubim humah khungin leeng hi; Huih i ha humah khungin manlang zetin hung hi.

¹¹ Khuathim tuah tuam cop hi; Tui tuah a dim mi meingo sahzet a elkimah um hi.

¹² A mai a khuaphelep al sung pen, Nial le meiling caak susuihin, meingo sahzet cu nawkvawk hi.

¹³ Topa cu van pen vanthum bangin thum dudum hi. Cungnungbelin, a aw suah hi.

¹⁴ A thalcang cu kapin, a ngalte lengkektik khawng hi; A khuaphelepin taitik khawng hi.

¹⁵ Topa aw, na ngalte hupin, na thinukin, na thup lih ten, tuipi thuanthum tawdeng cu langin, leipi i zungmutnakte lang khawng hi.

¹⁶ Topa in humlam pen a khut saanin, keimah len hi; Tui thukzet sung pen kei doksuah hi.

¹⁷ A ngilzetmi ka ngal tei khut sung pen suah hi; Kei a huatu le ka ca in, a ngilzetmi khut sung pen,

¹⁸ Haksatnak ka tawh ni-in amuh ten kei do haw hi. Mahnaven Topa in kei pan hi.

¹⁹ Launak pen himnak mun zalpi ah kei suah hi. Ka humah a lungdam hangin kei pan hi.

²⁰ A dikmi ka bawl hangin Topa in laksawng pia hi; Sualnak ka neih ngawl hangin thupha muicu pia hi.

²¹ Topa i lampi cu zui zo ing; Ka Pathian lak pen sual zetin taivawk awng mang

²² A daan hempoh ka mai ah langin, A thupiakmi pa khat hei zui ngawlin um awng mang.

²³ A mai ah sualnak nei mang, sualnak pen a dangno in um zo ing.

²⁴ Topa i mai ah ka diknak hangin laksawng pia hi. A mitmuhin ka khut a thianthoh bangin thupha pia hi.

²⁵ Topa aw, mi muantak tei lakah muantakin lang ci. Mi Cangkim tei lakah cangkimin langin zaangtha pha pia ci.

²⁶ Mi thiangtho tei lakah thiangtho in lang ci, Mahnaven mi siasuak tei ca in, a ngal hi ci.

²⁷ Mi niamkhiatte pan ci, mahnaven mi pualthaute supeek ci.

²⁸ Topa aw, nangmah in vaknak pia ci: Pathian in khuathim cu vaktik hi.

²⁹ Ka ngalte do theihnak tuk le kulhtiante tan vawk theihnak zaangtha pia ci.

³⁰ Hi Pathian i lampi hi a, cangkimmi hi. Topa i thutepmi cu muantak hi; A lakah belhnak a zeitu tei ca in, Amah cu ngal lumphol bang hi.

³¹ Topa sial ngawl Pathian dang akua um him? A Pathian uh humah suangpi dang um maw?

³² Amah cu ka tha ngiltiktu le ka lampi himtik hi.

³³ Sazuk bangin ka zuanzangtikin, A sannak munah himno in umtik hi.

³⁴ A khohbelmi thalcang tian kau thei tukin, amah in ngaldo dante hilh hi.

³⁵ Topa aw, nangmah in, na patnak lumphol kei pia ci. Na taklam khut tuah kho zetin kei len ci. Na nunnemnakin kei ngengtik ci.

³⁶ Ka hawhnak lampi zaltik ci. Bah awng mang hi.

³⁷ Ka ngalte hil ing a pha ing hi; Ka siatsuah khawng laklawh kik mang hi.

³⁸ Saat ing a, tholeh thei haw ma toh hi. Ka kebulah lum haw hi.

³⁹ Nangmah in hi ngaldonakah tha pia ci; Ka ngalte cu ka nuailamah lum khawng haw hi.

⁴⁰ Ka lak pen ka ngalte cu taitik ci, Kei a huatu hempoh cu siatsuah khawng ing.

⁴¹ Bopnak ngenin au haw mahnaven kuamah in luan ma hi. Topa i lakah au haw naven don ma hi.

⁴² Sepkeh khawng ing ama, huih i muhmi leivul bangin suak haw hi. Sikpek pepel ing a, lampi a, cinciak bangin suak haw hi.

⁴³ Mi langpang thei hinnam tei lak pen kei panin, minam tampi uktu in bawl ci. Ka theih awng ngawlmite cu ka nadektu in suak haw hi.

⁴⁴ Ka thu le la a theih haw ten ka thu cu zui haw hi; Ngamdang mite vang ka mai ah kuunin hung haw hi.

⁴⁵ Amuhte cu a thinsu in, a kulhtian haw sung pen cantawtokin tul haw hi.

⁴⁶ Topa cu nung hi. Ka himnak suangpi cu thangphat hi tahen. Pathian cu pantu hi. A thawmngeng dan phuang nung.

⁴⁷ Phu a laksaktu cu amah hi, mi hempoh ka ke nuai ah koih hi.

⁴⁸ Ka ngal tei khut pen kei pan hi. Topa aw, ka ngal tei humah khaisang ci; Mi suaksual tei lak pen kei pan ci.

⁴⁹ Maw Topa aw, hinnam tampi tei lakah nang pahcawi tung; Na min thangphatnak la in sa tung hi.

⁵⁰ Pathian in, a kumpi lakah nehnak ngengpi pia hi; A tenmi le sathau a thih zo mi, David le a casuan tei lakah a kho mi a itnak cu langtik leleng hi.