SAAM LABU 17 - Ngawm Bible

Bawlsiatu Khut Pen Luatnak Tuk Thungetnak

¹ Topa aw, diknak tukin, ka thungetnak hi ngai zalin, Bopnak ngenin ka aunak cu ngaihsutsak zal inna, ka thungetnak hi hu thei zalin hi. Itahim titale ka lungmu sungah zol nuamnak imah umma hi.

² Thudik na theih hangin, keimah panin thu cu khen tuk ci.

³ Ka lungmu cu nangmah in thei ci; zanlamin ka lakah hungin, thiatha zo le ci, ka sungah phat ngawlnak imah mu ma ci.

⁴ Midang bangin awnpha ngawl awn mang, Na thukham zui ing a, mipha ngawl tei lampi zui mang.

⁵ Na lampi ah hawh leleng ing a, ituk mahten pial awng mang.

⁶ Maw Pathian aw, na lakah thungen ing a, don leleng ci. Tu hei in, na beng hek inna, ka thu hi theihpihin hi.

⁷ Maw kei Pantu, na ihnak lamdang dan hi, langtik zalin hi. Na el a ummi hempoh cu ngal tei khut pen him haw hi.

⁸ Na mitcang na cinkhawi bangin kei hu cing zalin hi. Mipha ngawl ten kei do haw hi.

⁹ Mi that nuam ka ngal ten a kilh khawng haw ten, Na ha nuai ah kei hu sel zalin,

¹⁰ Hehpihnak imah nei haw ma, pualthau zetin awn haw hi.

¹¹ Ka hawhnak hempoh dongkanin kim khawng haw. Dokvawk tukin hunpha ngakbek haw hi.

¹² Kiosa bang hi haw in bawhkek tuk bek ngaisung haw hi. Pawpino bangin akua haw pen pang haw hi.

¹³ Topa aw, tho inna, ka ngalte cu do in nehin hi. Ka nunnak hi mipha ngawl tei khut pen, Na ngalnam tuah kei hupin hi.

¹⁴ Topa aw, na baantha ngil tuah kei hupin, amu covo cu a nunsung a comi hi toh hi. Amuta tukin na khawlsa mi bawlsiatnak tuah bawlsia in hi, A cano tei ca in bawlsiatnak um tahen na, a casuan tei ca vangin tang hih laih hen.

¹⁵ Mahnaven kei in diknak tuah na maimu tung hi. Ka khatlawh ten na maimu in, ka lungdamnak kim tuk hi.