SAAM LABU 16 - Ngawm Bible

Muansannak Thunget

¹ Maw Pathian aw, kei hup zalin; itahim titale nang cu ka himnak hi ci a, na lakah hung zo ing.

² Topa i lakah, “Nangmah cu ka Topa hi ci, Nangmah ngawlin phatnak imah nei mang,” ti ing.

³ Topa i mi thiangthote cu itih zahin kaw a mawi haw! Amuh tuah um cu ka lungdamnakbel hi.

⁴ Mahnaven pathian dadang lakah a tai kawkawi lite cu daldak haw tuk hi. Kei cu amuh tei biakpiaknakah tel tuk mang; A pathian tei min vang ka kam pen lo tuk mang.

⁵ Topa aw, nangmah bek hi ka belhmi hi ci; Ka kincak hempoh cu nangman pia ci. Ka mailam nunnak cu na khut sungah um hi.

⁶ Ka neih tukmi ngamngi na bawlsakmi cu ka ca in, a sunglawi daan cu itih zahin kaw a mawi?

⁷ A ngaihsut saktu Topa cu thangphat ing; Zanlam hei in ka lungmu sungah ngallinnak pia hi.

⁸ Ka lakah Topa um hi tih cu thei leleng ing; Ka elah a um hangin, imah in hing thei tukma hi.

⁹ Mah hangin lungdamnak le thinnopnak tuah dim ing; Ka lungmuang leleng hi.

¹⁰ Itahim titale mithi khua ah hawh phal tukma hi, Na ihmi cu khuk thukzet sungah zamthong tukma ci.

¹¹ Nangmah in nunnak lampi cu lak tuk ci; Na umnakah lungdamnak dim hi. Na baan tha ngilnakah kumkhua nopnak um hi.