SAAM LABU 148 - Ngawm BibleIhempoh Tuah Topa Thangphat Tuk 1 Topa cu thangphat un; Humlam a sannak mun a um miten, Topa cu vancung pen thangphat un. 2 A vancungmi hempohin amah thangphat un; A van ngalkap hempoh ten. 3 Ni le hade ten, amah thangphat un! A de mi aksite, amah thangphat un! 4 Vancung sangbelte le vanhum a, tuite hei in amah thangphat un! 5 A venghawng haw in, Topa i min thangphat haw hen; Ama thupiaknakin semsuahmi hi haw hi. 6 A thupiaknak hangin amu panmun tenah, kumkhua in kho haw hi. A thu el thei haw ma hi. 7 Leihum pen Topa cu thangphat un! Tuipi sung pen ngamsa ngengpi le tui thukpite, 8 khuaphelep le nial, vuk le meingo le huih siate a thu a ngaitu hempoh ten thangphat un! 9 Mualsangte le mualniamte, a ngahmi thingkung le tupi thingkung ten, amah thangphat un! 10 Inn ngulh nganhing hei hihen, hampa lak ngamsa hei hihen, vano le a bok a vakmi ngamsa hei in, Topa cu thangphat un! 11 Kumpite le miphun hempoh, bawi le uktute hempoh ten Topa thangphat un! 12 Khanglai le tangvalte hei in hihen, pitek putek le naupangte hei in hihen, Topa cu thangphat un! 13 A venghawng haw in, Topa i min cu thangphat haw hen! A min cu mindang hempoh sangin ngeng saw hi. A sunloihnak cu lei le vanhumah thang hi. 14 Ama mihing tei ngam cu caktikin, a deihmi Israel, Ama mihing hempoh ten thangphat haw tuk hi. Topa cu thangphat un! |
Ngawm Bible © Bible Society of Myanmar, 2014.
Bible Society of Myanmar