SAAM LABU 144 - Ngawm Bible

Kumpi In Pathian Thangphat

¹ Ka belhnak suangpi Topa cu thangphat un! Ngal do dan le ngalnam dan cu amah in zilh hi.

² Amah cu ka belhnak suangpi le ka kulhtian hi. Ka himnak tukin amah muang ing; Miphun dangte cu ka nuai ah koih hi.

³ Topa aw, na ngaihsut tak tukin mihing hi i hi haw kaw? Mihing thongpoh cu i hi haw a, na kinmawh lih?

⁴ Mihing cu haihawh thongpoh hi. A nunsung cu a pai lelem thei lim bang hi.

⁵ Topa, van khi hong inna, lang sukin, Mualte khi zen inna, meikhu tul tuk hi.

⁶ Khuapheleptik inna, na ngalte khenkhekin; Na thalcang kap inna taitik khawngin!

⁷ Humlam pen na khut san inna, Tui thukpi sung pen dok tulin pan zalin; Thudik a son awng ngawl mi le

⁸ Siatcamnak tuah zolthu a sontu, Ngamdang mitei khut sung pen hup zalin;

⁹ Maw Pathian aw, na lakah la thak sa tung; Phaidaak tumin la sahsak tung.

¹⁰ Kumpi tei lakah nehnak pia ci, Na sila David cu pan suak ci.

¹¹ Hehpihnak nei ngawl ka ngal tei khut pen hup inna, Thudik a hilh awng ngawltu le siatcamnak tuah zolthu a sontu, Ngamdangmi tei khut sung pepan zalin hi.

¹² A capate uh cu khangno a hih haw laihin, phazet le ngil zetin khangtomi thingkung bang hi haw hi. A canute uh cu kumpi inn mawitiktu. Innkil a phutmi suang khuam bang hi haw hen.

¹³ A beem uhte cu an namkim tuah dim hen. A lo ngamsung uh a tuu a thawng a zain cano nei haw hen.

¹⁴ A khuihon uhte pungzai haw henna, Pai thong le cuculh tihmi umma hen. A lampi uhah thasia in, kahnak awn au umma hen.

¹⁵ Mahtibang ngam cu ngam muicu hi; Topa Pathian cu Pathian hi tin, a biatu miphun cu mi muicu hi haw hi.