SAAM LABU 143 - Ngawm Bible

Bopnak Tuk Thungetnak

¹ Maw Topa ka thungetnak ngai inna, Hehpih ka ngetnak theihpih zalin hi. Nang cu a dikmi na hih hangin donleh zalin hi.

² Na thukhennak munah, kei na sila hi koih zal pahsun! Na mitmuhah misual ngawl kua mah umma.

³ Ka ngal ten hualin, nase zetin neh zo hi. A thimmi thawnginn sungah koihin, tanglaihin, a thi zo mite bang ing.

⁴ Mah hangin ka lungbingzet zo. lungamin um ing;

⁵ A bosa mi ni le hate theileh ing; Na thil bawl mite phawkleh ing, Na bawlmi hempoh ka lungmu sungah lang hi.

⁶ Na lakah thungenin ka khut zak ing. Leiko in tui a kin bangin, ka hawvangin nangmah kin hi.

⁷ Topa! donleh zalin; Muansannak nei ma toh ing. Ka lak pen ngelh zal pahsun! Mah ahimata mithi ngam a hawhtu tei lakah. Kei vang tel kha bok kawn ing.

⁸ Nangmah bek muang ing hi; A khohmi na itnak cu zingsialin theitik zalin hi. Ka thungetnak cu na lakah heng hi. Ka hawhnak tuk lampi lak zalin hi.

⁹ Topa aw, humhimnak deihin, na lakah hung ing; Ka ngal tei khut pen luattikin hi.

¹⁰ Nangmah cu ka Pathian ci; Na deihmi bawltu tukin zilhin hi. Ka humah pha zal inna, lampi lawnah pui zalin hi.

¹¹ Topa aw, na tepsa bangin pan zalin hi. Na phat hangin ka haksatnak sung pen luattikin hi.

¹² Kei na deih hangin ka ngalte cu thatin; na sila ka hih hangin, a bawlsiatute siatsuah khawngin;