SAAM LABU 140 - Ngawm Bible

Himdamnak Ca Thungen

¹ Maw Topa mipha ngawl tei khut pen hup inna; mi pualthau tei khut pepanin hi.

² A muh ten phat ngawlnak bek zei haw in, hauhdunnak bek ngaisung haw hi.

³ A lei haw cu micik lol ngul bang hi; A awn haw cu ngulngan ngu bang hi.

⁴ Topa, mipha ngawl tei lak pen hup inna, keimah laltik tukin le thisan suah tuk, a deih tei khut pepanin hi.

⁵ Mi ultung ten keimah thangsiah haw, ke pal thang siah haw hi. Keimah awk tukin lamtuanah thangsiah haw hi.

⁶ Topa i lakah, “Nangmah cu ka Pathian hi ci,” ti ing. Topa aw, bopnak ngenin ka aunak hi ngai zalin hi.

⁷ Maw Topa ka Pathian le huptu ngaldonak munah kei hup ngah zo ci.

⁸ Topa aw, mipha ngawlte cu a deih haw mi pia pahsun; A mi suamnak haw pitungtik pahsun.

⁹ Ka ngalte cu nehtu hitik pahsun. A mi tawhnak haw cu a hum hawah heng zal tahen.

¹⁰ A ling hehu meiling cu a hum hawah heng zal hen; Khuk sungah tul thei tuk ngawltohin, vawkmi hi tahen!

¹¹ A dik ngawlin midang sual a nawntute cu lawhting haw ma hen! Thisan suah a nuamtute cu phat ngawlnakin manin, siatsuah zal hen!

¹² Topa, nangin mi ca-ngah tei thu le mi tingsam tei covo lam tang ci tih thei ing.

¹³ Midikcang ten thangphatzet haw tuk: Amuhte cu na mitmuhah um haw tuk hi.