SAAM LABU 137 - Ngawm Bible

Israel Mi Saltang Tei Kahnak La

¹ Babilon ngun mawkah khungin Zion ngai in kap ung.

² Ka el uh a paaknem kung humah, ka phaidaak uh khaih mek ung;

³ Keimuh a mantu ten lasatik haw; Amuh lungdamtiktu tukin deih haw; “Zion thu le lasah sak un,” ti haw hi.

⁴ Itin kaw Topa i la cu miphun dang tei ngamah ka sak theih tuk uh?

⁵ Jerusalem nang ka phawkngil tale! Phaidaak tum thiam ngawltohin, um nang ngei.

⁶ Lasa thei ngawltohin, um nang ngei; Nang theileh ngawltohin! Ka lungdamnakbel cu nang hi ci; tih ka phawkngil tale!

⁷ Topa aw, Jerusalem a lak ni haw in, Edom mitei a bawl haw mi cu cing lelengin; “Siatsuah khawng un, siatsuah khawng un,” tin, a au haw khi phawkngil pahsun.

⁸ Babilon, nang cu siatsuah khawng hi tuk ci. Ka hum uh a, na bawlmi hempoh hangin, a hum a, phu a latu cu mi lungdam hi.

⁹ Nawicawp lih laihmi na naumomte la in, suanghiam humah a thattu cu mi lungdam hi.