SAAM LABU 136 - Ngawm Bible

Lungdamnak La

¹ Topa i lakah lungdam thu hilh un; Itahim titale amah cu pha hi. A ihnak cu kumkhua in kho hi.

² Pathian hempoh lak pen a ngengbel Pathian nelah lungdamnak thu hilh un; A ihnak cu kumkhua in kho hi.

³ Bawi hempoh lak pen bawibel lakah lungdam thu hilh un. A ihnak cu kumkhua in kho hi.

⁴ Amah bekin thasiahhuai bawlin; A ihnak cu kumkhua in kho hi.

⁵ A cihnakin vante bawl hi; A ihnak cu kumkhua in kho hi.

⁶ Leipi cu tui thukpi humah dingtik hi; A ihnak cu kumkhua in kho hi.

⁷ Amah in ni le ha vang bawl hi; A ihnak cu kumkhua in kho hi.

⁸ Ni cu sun uktu in bawl hi; A ihnak cu kumkhua in kho hi.

⁹ Hade le aksite cu zan uktu in bawl hi; A ihnak cu kumkhua in kho hi.

¹⁰ Izipt mitei capa upabel that khawng hi; A ihnak cu kumkhua in kho hi.

¹¹ Israel mite Izipt ngam pen pui tul hi; A ihnak cu kumkhua in kho hi.

¹² A baantha ngil le a khut thawmngeng tuah; A ihnak cu kumkhua in kho hi.

¹³ Tuipi san cu khentik hi; A ihnak cu kumkhua in kho hi.

¹⁴ Mah sung pen a mihingte pui hi; A itnak cu kumkhua in kho hi.

¹⁵ Faro le a ngalkapte cu tui sungah nimtik khawng hi; A ihnak cu kumkhua in kho hi

¹⁶ A mihingte ngmakhingah pui hi; A ihnak cu kumkhua in kho hi.

¹⁷ Kumpi ngilzette that khawngin; a ihnak cu kumkhua kho hi;

¹⁸ Kumpi minthangzette that khawng hi; A ihnak cu kumkhua in kho hi.

¹⁹ Amor kumpi Sihon that hi; A ihnak cu kumkhua in kho hi.

²⁰ Bashan kumpi Og vang that hi; A ihnak cu kumkhua in kho hi.

²¹ A ngam haw cu a mihing tei lakah pia hi; A ihnak cu kumkhua in kho hi.

²² A sila Israel lakah pia hi; A ihnak cu kumkhua in kho hi.

²³ Ngal a sun uhten ohte phawkngil ma; A ihnak cu kumkhua in kho hi.

²⁴ A ngal tei khut sung pen ohte luattik hi; A ihnak cu kumkhua in kho hi.

²⁵ Mihing le ngamsa hempoh an pia hi; A ihnak cu kumkhua in kho hi.

²⁶ Vancung Pathian nelah lungdamthu hilh un; A ihnak cu kumkhua kho hi.