SAAM LABU 132 - Ngawm Bible

Mun Thiangtho Thangphatnak

¹ Topa aw, David cu cing lelengin, a thuakmi hempoh vang phawkngil pahsun.

² Topa aw, a thutepmite le Israel Pathian Cungnungbel, na lak a thu a tepmi cu cing zalin hi.

³ “Innah pintuk mang zaunak hei ah kai tuk mang.

⁴ Cawl tuk mang, hih hei hihbu tuk mang.

⁵ Israel Pathian Cungnungbel ca tukin, mun ka muh laklawh le Topa i ca in, umnak inn ka sak laklawh,” tin ti ung hi.

⁶ Thutiam Kuang thu cu Bethlehem pen za ing a; Jearim i lo sungah mu zo ing,

⁷ “Topa i innah hawh nung inna, a kumpi khunnak mai ah khukdinin bia nung,” tin ti ung hi.

⁸ Topa, na huham langtiktu na Thutiam Kuang tuah na colhnak munah hung toh inna, kumkhua umin hi.

⁹ Na mihingte pantu cu nangmah hi ci. Thiampi ten tang aupih haw hen. Na mihingte lungdamin au haw hen.

¹⁰ Na sila David lakah thutepnak bawl zo ci; Topa aw, na tensa kumpi cu lawl zal pahsun.

¹¹ David lakah thutiam zo ci. Mah thutiam cu la kikleh tukma ci, “Na capa tei sung pen pa khat cu, Kumpi in bawl tung; Na ai-in kumpi hi tuk hi.

¹² Na capa ten ka thutep zui in, ka thupiakmite a ngai haw tale, a ca haw ten kumkhua in kumpi dek haw tuk hi,” tin ti ci.

¹³ Topa in Zion teng zo hi; A umnak tukin deih hi.

¹⁴ “Hilai ah kumkhua in um tung, ka umnak tukin deih ing.

¹⁵ Zion khuapi cu a kul a sapnak um tuk ngawlin an a dimin umtik hi. Hi ngam a, mi ca-ngahte cu an kham zetin pia tung.

¹⁶ A thiampite cu a nadehnak haw hempoh pen muicu pia tung a, a mihingte cu lungdamin, au thahin, lasa haw tuk hi.

¹⁷ David i casuan pa khat cu hilai ah kumpi hitik tung a, ka tenmi kumpipa i uknak cu hilai ah khotik tung.

¹⁸ A ngalte cu zahcaknak silhtik tung; Mahnaven ama uknak cu zal dedeuh tuk a, khangto pepel tuk,” ti hi.